राष्ट्रिय फुटबल खेलाडी पूजा राना सम्मानित

खेलकुद

काठमाडौं । भर्खरै सम्पन्न साफ महिला च्याम्पियनसिपमा नेपाललाई फाइनलसम्म पुर्‍याउन महत्त्वपूर्ण भूमिका निर्वाह गरेकी नेपाली महिला फुटबल टोलीकी राष्ट्रिय खेलाडी पूजा रानालाई कोहलपुर नगरपालिकाले सम्मान गरेको छ ।

कोहलपुर नगरपालिकाले रानालाई नगद रु.५१ हजार रुपैयाँ र प्रमाणपत्र प्रदान गर्दै रानाको उपलब्धि र योगदानको कदर गरेको हो । बङ्गलादेश सँगको प्रतिस्पर्धामा पराजित हुँदै नेपाली टोली उपविजेता बनेको थियो ।

सम्मान कार्यक्रममा नगर प्रमुख पूर्णप्रसाद आचार्यले खेलाडीलाई राष्ट्रको पहिचान र गहनाका रूपमा सम्मान गर्दै कोहलपुर नगरपालिका खेलाडी उत्पादन र प्रवर्धनमा निरन्तर सक्रिय रहेको बताए । उनले नगरपालिका स्तरमा स्कुल, वडा र गोल्ड कप जस्ता प्रतियोगिताहरू नियमित आयोजना गर्दै खेलाडीको विकास र आत्मबल बढाउन प्रयत्नशील रहेको उल्लेख गरे ।

कार्यक्रममा उपप्रमुख सङ्गीता सुवेदीले पूजा रानालाई सम्मान गर्न पाउँदा कोहलपुर नगरपालिका गर्वित भएको बताए। उनले स्थानीय स्तरमा राष्ट्रिय स्तरका खेलाडी उत्पादन गर्न स्थानीय सरकार प्रतिबद्ध रहेको र खेलकुदको क्षेत्रलाई प्राथमिकतामा राखेको बताए। खेलाडी रानाले सम्मानबाट थप प्रोत्साहन मिलेको बताईन् ।