पदावधि नसकिँदै राजिनामा दिने पूर्व मुख्यसचिव अर्यालको तयारी

breaking news

काठमाडौं । अन्तःशुल्क स्टिकर छपाइ भ्रष्टाचार मुद्दामा सफाई पाएका पूर्व मुख्यसचिव बैकुण्ठ अर्यालले राजीनामा दिने भएका छन् । उनले गत असार ९ गते विशेष अदालतमा अख्तियार दुरुपयोग अनुसन्धान आयोगले मुद्दा दायर गरेपछि असार १० गतेको मन्त्रिपरिषद बैठकले अर्याललाई योजना आयोगको कार्यालयमा विशिष्ट श्रेणीको मुख्यसचिव सरह पद सिर्जना गरेर स्थानान्तरण गरेको थियो । अर्यालले सोही पदबाट भोलि राजीनामा दिन लागेको बुझिएको छ ।

अर्याल विरुद्ध गत असारमा अन्तःशुल्क स्टिकर छपाइ खरिदमा भ्रष्टाचार गरेको आरोपसहित दायर गरिएको मुद्दामा विशेष अदालतले कात्तिक दोस्रो साता सफाई दिएपछि अर्याललाई मुख्यसचिव सरहको हैसियतमा सरकारी सेवामा फर्कन बाटो खुलेको थियो । तर, सरकारले योजना आयोगमा सिर्जित विशेष पदमा कायम गरेपछि झण्डै एक वर्ष पदावधि बाँकी रहेका अर्यालले भोलि राजीनामा दिन लागेको बुझिएको छ ।

तत्कालीन मुख्यसचिवले चाडबाडको मुखमा राजीनामा दिँदा गलत अर्थ लाग्ने भएकाले तिहार र छठ पर्व सकिएपछि घर बस्ने मनसाय पहिले नै राखेको बताइन्छ । ‘मुद्दा जितेको अवस्थामा उनी सरकारसँग टसल गरेर बस्ने मुडमा थिएनन् । त्यसैले पदावधि बाँकी छँदै सरकारी सेवाबाट राजीनामा दिन लागेका हुन्,’ स्रोतको दाबी छ ।

विशेष अदालतका अध्यक्ष टेकनारायण कुँवर, सदस्य न्यायाधीशद्वय खुशीप्रसाद थारू र रितेन्द्र थापाको इजलासले राष्ट्रिय गौरवका कार्यक्रम आयोजना गर्ने जिम्मेवारी र दायित्वसमेत भएको व्याख्या गरेर अर्याललाई निर्दोष देखाइदिएको थियो ।

अर्यालको निलम्बनपछि असारदेखि लीलादेवी गड्तौला पहिले निमित्त र पछि कायममुकायम मुख्यसचिव बनिन् । भदौ १३ गतेदेखि सचिव एकनारायण अर्याल मुख्यसचिवमा नियुक्त भएका थिए ।