अष्ट्रेलियालाई हराउँदै भारत च्याम्पियन्स ट्रफीको फाइनल प्रवेश

खेलकुद

काठमाडौं । आइसिसी च्याम्पियन्स ट्रफी–२०२५ मा भारत उपाधि नजिक पुगेको छ। मंगलबार दुबईमा भएको पहिलो सेमिफाइनलमा अस्ट्रेलियालाई ४ विकेटले पराजित गर्दै भारत फाइनलमा प्रवेश गरेको हो।

मंगलबार दुबई अन्तर्राष्ट्रिय मैदानमा अस्ट्रेलियाले दिएको २६५ रनको लक्ष्य भारतले ६ विकेटको क्षतिमा ४८.१ ओभरमा पूरा गर्‍यो भारतका लागि विराट कोहलीले ९८ बल खेलेर ५ चौका प्रहार गर्दै सर्वाधिक ८४ रन जोडे । त्यसअघि कप्तान तथा ओपनर रोहित शर्माले २८ रन, अर्का ओपनिङ ब्याटर शुभमन गिल ८ रनमा आउट भए।

श्रेयस अय्यर ४५ रन र अक्षर पटेल २७ रनमा आउट भए। केएल राहुलले नटआउट ४२ रन बनाउँदा हार्दिक पाण्ड्या २४ बलमा २८ रन जोडेर आउट भए। बलिङमा अस्ट्रेलियाका नाथान इल्स र एडम जाम्पाले २–२ विकेट लिए।

मंगलबार दुबईमा टस जितेर पहिले ब्याटिङ गरेको अस्ट्रेलिया ४९.३ ओभरमा २६४ रनमा अलआउट भयो। अस्ट्रेलियाका लागि कप्तान स्टिभ स्मिथले ९६ बलमा ४ चौका र १ छक्काको मद्दतमा ७३ रन बनाए। एलेक्सा क्यारीले रनआउट हुनुअघि ५७ बलमा ८ चौका र १ छक्का प्रहार गर्दै ६१ रनको योगदान गरे।

ओपनर ट्राभिस हेडले ३९ रन बनाउँदा उनका ओपनिङ पार्टनर कूपर कनोली शून्यमा आउट भए। मार्नस लबुसेन ११ रन र ग्लेन म्याक्सवेल ७ रन मात्र जोड्न सके। बलिङमा भारतका मोहमद शामीले ३ विकेट लिए। बरुण चक्रवर्ती र रवीन्द्र जडेजाले २–२ विकेट हात पार्दा हार्दिक पाण्ड्या र अक्षर पटेलले १–१ विकेट आफ्नो नाममा लेखाए।

उपाधिका लागि भारतले दक्षिण अफ्रिका वा न्यूजिल्यान्डमध्ये एक टोलीसँग आइतबार दुबईमा नै प्रतिस्पर्धा गर्नेछ। दक्षिण अफ्रिका र न्यूजिल्यान्ड बुधबार पाकिस्तानको लाहोरमा हुने दोस्रो सेमिफाइनलमा भिड्दै छन।