सत्तारुढ दलको बैठकमा गगन थापा पटकपटक अनुपस्थित

राजनीति

काठमाडौं । आज दिउँसो करिब ११ बजे प्रधानमन्त्रीको सरकारी निवास बालुवाटारमा बसेको सत्ता गठबन्धनको बैठकमा गगन थापा अनुपस्थित भएका छन् ।

सरकारका कामकारबाही, शिक्षक आन्दोलन, आगामी आर्थिक वर्ष २०८२/०८३ को नीति तथा कार्यक्रम लगायत विषयमा छलफल गर्न प्रधानमन्त्रीले बोलाएको बैठकमा नेपाली काँग्रेसका महामन्त्री समेत रहेका थापा अनुपस्थित भएका हुन् ।

पछिल्लो समय प्रधानमन्त्री केपी शर्मा ओलीको कार्यशैलीलाई लिएर असन्तुष्ट थापा सत्ता गठबन्धनका पछिल्ला बैठकमा अनुपस्थित रहँदै आएका छन् । प्रधानमन्त्रीको बेडरुमसम्म बिचौलियाको पहुँच रहेको भन्दै सार्वजनिक कार्यक्रममा भाषण गरेपछि प्रधानमन्त्री गगन र प्रधानमन्त्रीबीचको सम्बन्ध चिसिएको छ ।

आजको बैठकमा नेपाली कांग्रेसबाट सभापति शेरबहादुर देउवा, उपसभापति पूर्णबहादुर खड्का र परराष्ट्रमन्त्री आरजु राणा उपस्थित भएका थिए । त्यस्तै, एमालेका तर्फबाट प्रधानमन्त्री ओलीसहित वरिष्ठ उपाध्यक्ष इश्वर पोखरेल, महासचिव शंकर पोखरेल, प्रदीय ज्ञवाली र प्रधानमन्त्रीका राजनीतिक सल्लाहाकार विष्णु रिमाल र लोसपाका अध्यक्ष महन्थ ठाकुर, जसपाका अध्यक्ष अशोक राई, खानेपानीमन्त्री प्रदीय यादव, श्रममन्त्री शरदसिंह भण्डारी लगायतका नेताहरुको उपस्थिती रहेको थियो ।