‘भारत र पाकिस्तानबीचको तनावमा अमेरिकाले हस्तक्षेप नगर्ने’: उपराष्ट्रपती भान्स

राजनीति

काठमाडौं । पछिल्ला दिनहरुमा दुई छिमेकी देशहरु भारत र पाकिस्तान आपसमा गोलाबारी गरिरहँदा अमेरिकी उपराष्ट्रपति जेडी भान्सले आफ्नो प्रतिक्रिया व्यक्त गरेका छन् ।

गत अप्रिल महिनाको २२ तारिखमा भारतको काश्मीरको पर्यटकिय स्थल पहलगाममा भएको आतंकवादी हमलाको जवाफ भारतले मे ७ मा पाकिस्तानका आतंकवाद लक्ष्यित हमला‘अपरेशन सिन्दुर’ गरेपछि चुलिएको द्धन्द्धका बिच अमेरिकी उपराष्ट्रपती भान्सको प्रतिक्रिया आएको हो ।

उनले, भारत र पाकिस्तानबीचको बढ्दो तनावमा अमेरिकाले हस्तक्षेप नगर्ने भन्दै प्रतिक्रिया दिएका छन् । भान्सले बिहीबार फक्स न्युजसँगको अन्तर्वार्तामा भारत पाकिस्तानबीचको ‘युद्ध’मा अमेरिका संलग्न नहुने र हस्तक्षेप नगर्ने बताएका हुन्।

‘हामी तनाव कम गराउने प्रयत्नसम्म गर्न सक्छौं। तर युद्धमा संलग्न हुन्नौं। त्यो हाम्रो काम होइन,’उनले भनेका छन्। भान्सले भारत-पाकिस्तानबीचको तनाव अमेरिकाको मामिला नभएको पनि बताएका छन्। यद्यपि कुटनीतिक माध्यमबाट तनावग्रस्त अवस्थालाई समाधानको प्रयत्न भने गर्न सकिने बताएका छन् ।

‘हामी यी दुवै देशलाई नियन्त्रण गर्न सक्दैनौं । त्यसकारण आधारभूत रूपमा यो हाम्रो सरोकारको विषय पनि होइन,’ उनले भनेका छन्।

भान्सले भारत–पाकिस्तानबीचको तनाव क्षेत्रीय युद्ध वा परमाणु संघर्षमा परिणत नहुने आशा व्यक्त गरेका छन्। यसअघि राष्ट्रपति डोनाल्ड ट्रम्पले भारत र पाकिस्तानबीच शान्ति स्थापना गर्न आफू मध्यस्थकर्ताको भूमिका खेल्न तयार रहेको बताएका थिए।

बुधबार राति भारतले पाकिस्तानका ९ स्थानमा निशाना बनाएर मिसाइल आक्रमण गरेपछि पनि ट्रम्पले भारत–पाकिस्तान तनाव धेरै लामो नजाने आशा व्यक्त गरेका थिए।

पाकिस्तानले बुधबारको आक्रमणको जबाफस्वरूप भारतका विभिन्न भूभागहरूमा मिसाइल र ड्रोनले प्रहार गरेको छ। भारतको हवाइ प्रतिरक्षा प्रणालीले पाकिस्तानले प्रहार गरेका मिसाइलहरू नष्ट गरेको भारतीय सञ्चारमाध्यमहरूले जनाएका छन्।