आईसीसी लिग–२ः टस जितेर स्कटल्याण्डलाई नेपालद्धारा ब्याटिङको निम्तो

Blog

- न्यूज नेपाल

काठमाडौं । आज सोमबारदेखि स्कटल्यान्डमा सुरु भएको आईसीसी क्रिकेट विश्वकप लिग–२ क्रिकेटअन्तर्गत स्कटल्याण्ड, नेपाल र नेदरल्याण्ड्सबीचको एकदिवसीय शृंखलाको पहिलो खेलमा नेपालले स्कटल्याण्डसँग खेल्दै छ ।

डुनेडीमा केहीबेरमा सुरु हुने खेलमा नेपालले टस जितेर पहिले बलिङ गर्ने निर्णय गरेको छ । कप्तान रोहित पौडेलले टस जितेर पहिले स्कटल्याण्डलाई ब्याटिङको निम्तो दिएका हुन् ।

नेपालले स्कटल्याण्डसँग यस लिग २ साइकलमा यसअघि पनि खेलिसकेको छ । अमेरिकामा गत अक्टोबरमा भएको लिग २ शृंखलामा नेपालले स्कटल्याण्डसँग एक खेल जित्दा एक खेल वर्षाका कारण हुन सकेन ।

हालसम्म नेपाल र स्कटल्याण्डबीच ओडिआईमा भएका ८ खेलमध्ये ४ खेल नेपालले जितेको छ भने स्कटल्याण्डले ३ खेल जित्दा १ नतिजाविहीन छ । पछिल्ला चार खेलमा नेपाल अपराजित छ जहाँ ३ जित निकाल्दा १ नतिजाविहीन थियो ।

नेपालको टोलीमा रोहित पौडेल (कप्तान), दिपेन्द्रसिंह ऐरी, आसिफ शेख, कुशल भुर्तेल, भिम सार्की, आरिफ शेख, गुलशन कुमार झा, सन्दीप लामिछाने, सोमपाल कामी, करण केसी र रिजन ढकाल छन् ।