पाँच बलमा पाँच विकेटको किर्तिमान आयरल्यान्डका कर्टिसको नाममा

काठमाडौं । विश्व क्रिकेटमा खेलाडीहरुले आफ्नो जादुमयी खेल प्रदर्शनका कारण नयाँनयाँ किर्तिमान राख्दै इतिहास रच्दै आएका छन् । त्यस्तै, आयरल्यान्डका अलराउन्डर कर्टिस क्याम्फरले व्यावसायिक क्रिकेटमा पाँच बलमा लगातार पाँच विकेट लिने पहिलो पुरुष बलर बनेर इतिहास बनाएका छन्।

उनले इन्टर–प्रोभिन्सियल टी–२० ट्रफी अन्तर्गत नर्थ–वेस्ट वारियर्सविरुद्ध मन्स्टर रेड्सका लागि यो कीर्तिमान बनाएक हुन्। उनले आफ्नो २.३ ओभरको स्पेलमा १६ रन खर्चेर ५ विकेट लिँदै समाप्त गरे।

मन्स्टर रेड्सका कप्तान क्याम्फरले आफ्नो दोस्रो र तेस्रो ओभरमा गरी यी पाँच विकेट लिएका थिए। १८९ रनको लक्ष्य पछ्याइरहेको वारियर्स उनको यो प्रदर्शनसँगै ८७ रनमा ५ विकेटको स्थितिबाट ८८ रनमा अलआउट हुन पुगेको थियो।

आफ्नो उपलब्धिबारे क्याम्फरले , ‘ओभर परिवर्तन भएकाले के भइरहेको छ भन्ने मलाई खासै थाहा थिएन। मैले आफ्नो योजनामा अडिग रहेर बलिङलाई एकदमै सामान्य राखें र भाग्यले साथ दियो ।’

टी–२० अन्तर्राष्ट्रियमा लगातार चार बलमा चार विकेट लिने खेलाडीको सूचीमा रहेका क्याम्फर पाँच बलमा पाँच विकेट लिने पहिलो बलर भने होइनन्। यसअघि जिम्बाब्बेकी महिला अलराउन्डर केलिस नाममा पनि पाँच बलम पाँच विकेटको कीर्तिमान थियो। उनले सन् २०२४ मा घरेलु टी-२० प्रतियोगितामा पाँच बलमा पाँच विकेट लिएकी थिइन्।

Comments

• कर्टिस क्याम्फर
• क्रिकेट