खाँदबारीमा पारुहाङ र सुम्निमाको शालिक अनावरण !

कोशी प्रदेश

- NEWS NEPAL

काठमाडौं । संखुवासभा जिल्लाको खाँदबारी नगरपालिका– १, ढोलबाजे डाँडामा पारुहाङ र सुम्निमाको शालिक अनावरण भएको छ ।

खाँदबारी नगरपालिकाको आर्थिक तथा प्राविधिक लगानीमा निर्माण गरिएको पारुहाङ र सुम्निमाको शालिक मंगलबार नगर प्रमुख महेश थपलियाले अनावरण गरेका हुन् ।

कार्यक्रममा बोल्दै थपलियाले क्षेत्री, ब्राम्हण होस् वा जनजाती जो भए पनि हामी सबै किराँत सभ्यताभित्र हुर्किएका मानिस भएकाले यस सभ्यताको संरक्षण र सम्बर्द्धन गर्नुपर्नेमा जोड दिए ।

थपलियाले भने,‘हामी सबै किराँत सभ्यतामा हुर्किएका मान्छे हौंं, चाहे क्षेत्री होस् वा ब्राम्हण या जोसुकै होस् हामी किराँत सभ्यतामा हुर्किएका मान्छे हौं । त्यसैले यस सभ्यताको संरक्षण तथा सम्बर्द्धन गर्नु हामी सबैको दायित्व हुन आउँछ ।’

उनले अनावरण गरिएको मूर्तिहरुको विभिन्न माध्यमबाट प्रचारप्रसार गर्नका लागि पनि आह्वान गरेका छन् । पारुहाङ र सुम्निमालाई किराँत धर्मका मूल देवता मानेर किराँत समुदायले प्रेम र श्रद्धापूर्वक पुजा गर्ने गर्दछन् ।