आईसीसी टी–२० विश्वकप ट्रफी वसन्तपुर, बौद्धनाथ र पोखरामा प्रदर्शनी हुने

खेलकुद

काठमाडौं । आईसीसी टी–२० विश्वकप क्रिकेटको ट्रफी नेपालका प्रमुख पर्यटकीय तथा धार्मिक स्थलहरूमा प्रदर्शन गरिने भएको छ। ट्रफी काठमाडौंको वसन्तपुर दरबार क्षेत्र, बौद्धनाथ स्तूप परिसर तथा पोखरामा राखिने नेपाल क्रिकेट संघ (क्यान)ले जनाएको छ।

ट्रफी टुरअन्तर्गत नेपाल आइपुगेको विश्वकप ट्रफी सोमबार राष्ट्रपति कार्यालयमा प्रदर्शन गरिएको थियो। क्यानका प्रवक्ता छुम्बी लामाका अनुसार मंगलबार ट्रफी पोखरामा प्रदर्शनीका लागि लगिनेछ।

कार्यतालिकाअनुसार मंगलबार बिहान ८ बजेदेखि १२ बजेसम्म पोखरामा ट्रफीको फोटो सुट गरिनेछ। त्यसपछि सोही दिन दिउँसो ४ बजेदेखि ६ बजेसम्म काठमाडौंको वसन्तपुर दरबार क्षेत्रमा ट्रफी सार्वजनिक रूपमा प्रदर्शन गरिनेछ। यस्तै, बुधबार दिउँसो २ बजेदेखि ३ बजेसम्म बौद्धनाथ स्तूप परिसरमा ट्रफी प्रदर्शनीमा राखिने क्यानले जानकारी दिएको छ।

आईसीसी टी–२० विश्वकप आगामी फेब्रुअरी ७ देखि मार्च ८ सम्म आयोजना हुनेछ। प्रतियोगितामा नेपाल सहभागी हुँदैछ, जुन नेपालको तेस्रो टी–२० विश्वकप सहभागिता हुनेछ।