नेपाली क्रिकेट टोली श्रीलंका ‘ए’सँग आज तेस्रो टी–२० अभ्यास खेल खेल्दै !

खेलकुद

- न्यूज नेपाल

काठमाडौं । आईसीसी टी–२० विश्वकपको तयारीमा जुटेको नेपाली पुरुष क्रिकेट टोलीले श्रीलंका ‘ए’ सँग आज तेस्रो तथा अन्तिम अभ्यास टी–२० खेल खेल्दैछ। खेल कोल्ट्स मैदानमा दिउँसो हुने छ।

यसअघि भएका दुवै अभ्यास खेलमा पराजित भएको नेपाल अन्तिम खेलमार्फत जित हासिल गर्ने लक्ष्यमा रहने छ। पहिलो अभ्यास खेलमा नेपाल ६ विकेटले पराजित भएको थियो भने दोस्रो खेलमा ७३ रनको फराकिलो अन्तरले हार व्यहोरेको थियो।

श्रीलंका ‘ए’ टोलीमा सिनियर राष्ट्रिय टोलीबाट खेलिसकेका अनुभवी खेलाडीहरू समावेश छन्। निरोशन डिक्वेला, लाहिरु उडारा, सहान अराकिगे, नुवानिदु फर्नान्डो र नुवान थुसाराजस्ता खेलाडीहरू मैदानमा उत्रिरहेका छन्।

आजको अभ्यास खेलपछि नेपाली टोली भारत प्रस्थान गर्ने कार्यक्रम छ। भारतमा नेपालले मुम्बईको एमसीए प्रेसिडेन्ट–११ सँग तीन अभ्यास टी–२० खेल खेल्ने तालिका रहेको छ।

आईसीसी टी–२० विश्वकप फेब्रुअरी ७ देखि भारत र श्रीलंकामा संयुक्त रूपमा सुरु हुँदैछ। नेपालले प्रतियोगिताको आफ्नो पहिलो खेल फेब्रुअरी ८ मा इंग्ल्यान्डविरुद्ध खेल्नेछ।