‘वरिष्ठतम् नायव महान्यायाधिवक्ता सञ्जीवराज रेग्मी’ अनिवार्य अवकाशमा जाँदै

राजनीति

काठमाडौं । महान्यायाधिवक्ता कार्यालयका वरिष्ठतम् नायव महान्यायाधिवक्ता सञ्जीवराज रेग्मी भोलि शनिबारदेखि अवकाशमा जाँदैछन् । उमेर हद ५८ वर्ष पूरा भएपछि उनी अवकाशमा जान लागेका हुन्। उनलाई भोलि शनिबार परेकाले आज शुक्रबार विदाई गरिँदैछ । २०२५ साल असोज १८ गते जन्मिएका रेग्मी २०५० साल साउन १ गते तृतीय श्रेणीमा नियुक्त भएका थिए ।

यसैगरी २०५९ साल साउन ४ गते द्वितीय श्रेणीमा र २०७० साल माघ ३ गते प्रथम श्रेणीमा रहेर जिम्मेवारी पूरा गरेका थिए । ‘वरिष्ठतम् नायव महान्यायाधिवक्ता’ को पदमा भने २०८० साल जेठ २ गते नियुक्त भएका थिए । रेग्मी सरकारी कर्मचारीमा अब्बल, मुद्धा बुझेका, फोजदारी कानुनका ज्ञाता र संविधान विज्ञका रुपमा चिनिन्छन् ।

उनी स-सानो समूहमा रमाउने व्यक्तिका रुपमा चिनिन्छन् । उनले आफ्नो कार्यकालभरि आफू निकटकालाई चाहेका ठाउँमा सरुवा, विदेशमा तालिमदेखि विभिन्न अवसर दिएका थिए । अवकाश हुने बेलामा पनि केही उपन्यायाधिवक्ता र सहायक न्यायाधिवक्ताको गुपचुप सरुवामा चासो देखाएको, आफ्ना निकटकालाई राम्रो ठाउँमा पोष्टिङ गरेका थिए ।