को हुन् वरिष्ठम् महान्यायाधिवक्ता लोकराज पराजुली ?

काठमाडौं । महान्यायाधिवक्ताको कार्यालयका वरिष्ठम् महान्यायाधिवक्ता लोकराज पराजुली भएका छन् । निवर्तमान वरिष्ठतम् महान्यायाधिवक्ता सञ्जीवराज रेग्मी यही असोज १७ गतेदेखि अनिवार्य अवकाशमा गएपछि पराजृुली वरिष्ठम् महान्यायाधिवक्ता भएका हुन् । महान्यायाधिवक्ताको कार्यालयमा चारजना नायव महान्यायाधिवक्ताको दरबन्दी रहेकामा सिनियर भएकाले पराजुली वरिष्ठतम् महान्यायाधिवक्ता भएका हुन् । वरिष्ठतम् महान्यायाधिवक्ताले संवैधानिक महाशाखा आर्थिक, प्रशासनिक र बढी मुद्धा भएका जिल्ला र उच्च सरकारी वकिलको जिम्मेवारी सम्हाल्ने छन् । बढी मुद्धा भएका जिल्ला र उच्च सरकारी वकिलको कार्यालय पनि वरिष्ठतम् महान्यायाधिवक्ताले हेर्छन् ।

को हुन् लोकराज पराजुली ?

पराजुलीले नेपालको न्याय क्षेत्र र सरकारी वकिलका रूपमा लामो समय सेवा प्रदान गरेर गहन अनुभव बटुलेका छन् । सहन्यायाधिवक्ता र प्रवक्ता रहँदा उनले ललिता निवास जग्गा प्रकरण जस्ता राष्ट्रिय चासोका महत्त्वपूर्ण तथा ठूला मुद्दाहरूको कानूनी प्रक्रिया र सञ्चार समन्वयमा नेतृत्वदायी भूमिका निर्वाह गरेका थिए ।

सरकारी सेवा प्रवेश विषय केलाउँदा उनी न्याय सेवाको समूह छुट्याएर पहिलो पटक भएको प्रतिस्पर्धामा सरकारी वकिल समूहमा एक नम्बरमा नाम निकाल्न सफल भएका थिए । उनी विक्रम सम्वत् २०५२ साल पौष २६ गते तृतीय श्रेणीमा सरकारी वकिल समूहमा नियुक्त भएका थिए । त्यति बेला न्याय समूहमा कुल १३८ जनाले अधिकृत पदमा नाम निकाल्न सफल भएका थिए । सरकारी वकिल सम्ुहमा २९ जना अधिकृतमध्ये उनले एक नम्बरमा अधिकृत तहमा नाम निकालेका थिए । यसैगरी त्यतिबेला न्याय समूहमा ९२ जना र कानुन समूहमा १७ जनाले अधिकृत तहमा नाम निकालेका थिए । कानुन समूहको एक नम्बरमा नाम निकाल्न सफल लीला गड्तौला भने मुख्यसचिवबाट अवकाश भइसकेकी छन् भने न्याय समहुमा एक नम्बरमा नाम निकालेका श्याम कुमार भट्टराई हाल उच्च अदालतका न्यायाधीश छन् ।

विक्रम सम्वत २०२६ साल जेठ ११ गते भोजपुरमा जन्मिएका पराजुली २०६३ साल कात्तिक ३ गते उपसचिव भएका थिए । यसैगरी सहसचिवमा २०७० माघ ९ गते नियुक्त भएका थिए । नायव महान्याधिवक्तामा २०८० साल असोज १६ गते नियुक्त भएका थिए । पराजुली सरकारी वकिल समूहका जानकार नायव महान्यायाधिवक्तामा पर्दछन् । काठमाडौं, झापा, मकवानपुर, डोटी ंलगायत जिल्लामा सरकारी वकिल कार्यालयको नेतृत्व उनले गरिसकेका छन् । उच्च सरकारी वकिल कार्यालय पाटनको पनि प्रमुख भएर काम गरेको अनुभव उनीसँग छ । यस्तै विभिन्न आयोग र संवैधानिक निकायमा रहेर जिम्मेवारी सम्हालेको पनि उनीसँग अनुभव छ ।

उनले देशका विभिन्न जिल्ला सरकारी वकिल कार्यालयहरू, कारागार र प्रहरी कार्यालयहरूको कानुनी अनुगमन, निरीक्षण एवं मानव अधिकारको अवस्था मूल्याङ्कन गर्ने टोलीहरूको सफल नेतृत्व गरे । पराजुली सरकारी कानुनी प्रतिरक्षा, अभियोजन प्रणाली सुधार र नेपालको फौजदारी न्याय प्रणालीको सुदृढीकरणमा एक परिपक्व र अनुभवी अधिकारीका रूपमा चिनिन्छन् ।

Comments