अमेरिकी निर्णयको अफगान राष्ट्रपतिद्वारा स्वागत

सूचना प्रविधि

काबुल, २३ असार । अमेरिकी राष्ट्रपति बाराक ओबमाले अफगानिस्तानमा अमेरिकी सेना रहने भनी बुधबार गर्नुभएको निर्णयको अफगान राष्ट्रपतिले स्वागत गर्नुभएको छ ।
अमेरिकी राष्ट्रपति बाराक ओबामाले बुधबार एक पत्रकार सम्मेलन गर्दै अफगानिस्तानमा सन् २०१७ को अन्त्यसम्ममा नै कम्तीमा पनि आठ हजार ४०० अमेरिकी सेना तैनाथ रहने बताउनुभएको थियो ।

अफगानिस्तानको वर्तमानमा रहेको कमजोर सुरक्षास्थितिलाई मध्यनजर राख्दै आगामी वर्षसम्म नै अफगानिस्तानमा अमेरिकी सेना रहने विषयमा उहाँले बुधबार स्पष्ट गर्नुभएको थियो ।

अमेरिकी सरकारले यसअघि सन् २०१६ को अन्त्यसम्ममा अफगानिस्तानमा रहँदै आएका अमेरिकी सेनाको सङ्ख्या घटाएर पाँच हजार ५०० मा झार्ने निर्णय गरेको थियो ।

अफगानिस्तानका राष्ट्रपति असरफ घानीद्वारा बिहीबार जारी विज्ञप्तिमा अमेरिकाको सो निर्णयको उहाँले स्वागत गर्नुभएको बताइएको छ ।

राष्ट्रपतिको कार्यालयको वेवसाइटमा उहाँले अमेरिकी राष्ट्रपति ओबामाको निर्णयको स्वागत गरी जारी गर्नुभएको विज्ञप्ति राखिएको काबुलबाट प्राप्त समाचारमा जनाइएको छ ।

त्यसैबमोजिम नै यसअघिका वर्षहरुमा अमेरिकी सेनाको सङ्ख्या अफगानिस्तानबाट घटाउदै लगिएको थियो । सङ्ख्या घटाउदै लाने र अफगानिस्तानबाट पूर्ण रुपमा अमेरिकी सेना हटिसक्ने नीति यसअघि अमेरिकाले लिएको थियो ।

तर पछिल्लो समयमा अफगानिस्तानमा पुनः तालिबानहरुको आक्रमणको गति बढ्न थालेको जस्तो देखिएको छ । सुरक्षा अवस्था कमजोर हुदै गएकोछ ।

अमेरिकी राष्ट्रपति ओबामाले बुधबार भन्नुभएको थियो– मैले आज गरेको यस निर्णयले मेरो उत्तराधिकारीले पनि अफगानिस्तानमा अमेरिकी सेनाले गरेको जारी प्रगतिमा थप बल पुग्नेगरी निर्णय लिन सक्नेछ र आतङ्कवाद नियन्त्रणका लागि सहज हुनेछ ।

यसअघिको करिब १३ वर्षको सैनिक उपस्थितिपछि नेटो सेनाले भने अफगानिस्तानमा आफ्नो उपस्थितिलाई सन् २०१४ को अन्त्यससँगै अन्त्य गरेको थियो । अमेरिकी सेनाले नेटो सैनिकको नेतृत्व गरेको थियो ।
अमेरिकी राष्ट्रपतिको अफगानिस्तानमा सेना विस्तारको प्रस्ताव र अफगान सरकारको यस स्वीकृतिले आगामी दिनमा पनि अफगान र अमेरिकासम्बन्ध विस्तारमा थप सहयोग पुग्ने अपेक्षा गरिएको छ । रासस/एएफपी