बैद्यनाथ बाहिनीलाई ‘सशस्त्र प्रहरी महानिरीक्षक रनिङ ट्रफि’को उपाधि

खेलकुद

काठमाडौं, १७ असोज । सशस्त्र प्रहरी महानिरीक्षक दुर्जकुमार राईले ६ स्वर्ण, ६ रजत र ६ कास्यसहित प्रथम हुन सफल सुदूर पश्चिम क्षेत्रीय सशस्त्र प्रहरी बल मुख्यालय बैद्यनाथ बाहिनी अत्तरिया कैलालीलाई असोज ‘सशस्त्र प्रहरी महानिरीक्षक तेस्रो रनिङ ट्रफि–२०७३’ प्रदान गरेका छन् ।

सशस्त्र प्रहरी बल प्रधान कार्यालय हल्चोक स्वयम्भुमा असोज ११ गतेबाट संचालन भएको सो प्रतियोगितामा ५ स्वर्ण, ४ रजत र ५ कास्यसहित पूर्व क्षेत्रीय सशस्त्र प्रहरी बल मुख्यालय बराह बाहिनी पकली सुनसरी दोश्रो तथा ३ स्वर्ण, २ रजत र १ कास्यसहित मध्य पश्चिम क्षेत्रीय सशस्त्र प्रहरी बल मुख्यालय महेश्वरी बाहिनी सुर्खेत तेस्रो भएको हो ।

सशस्त्र प्रहरी महानिरीक्षक राईले आइतबार प्रतियोगिताको बिजयी टिम तथा खेलाडीहरुलाई पुरस्कार तथा प्रमाणपत्र प्रदान गरे ।

सशस्त्र प्रहरी महानिरीक्षक राईले सो अवसरमा संगठनले आफ्नो क्षमताभित्र रहेर खेलकुदलाई अगाडि बढाई रहेको बताउनुहुँदै खेलकुदले आपसी भाईचारमा अभिबृद्धि गराउने उल्लेख गरे ।

उनेले जहाँ नियमित खेलकुद हुन्छ र रंगशाला बन्छ, त्यहाँ धेरै अस्पतालको जरुरत हुँदैन भन्नुहुँदै सवैले शारीरिक तथा मानसिक रुपमा स्वस्थ रहन केही न केही खेलकुदलाई आफ्नो अभ्यासको साधन बनाउनु पर्ने र यसबाट सकारात्मक सोचको विकास हुने बताए ।

आफ्नो खेलकुद जीवनको स्मरण गर्नुहुँदै सशस्त्र प्रहरी महानिरीक्षक राईले सशस्त्र प्रहरी बलका खेलाडीहरुलाई उत्कृष्ट खेल प्रदर्शन र मेहनतका लागि प्रेरित समेत गरे ।

कार्यक्रममा सशस्त्र प्रहरी बल केन्द्रीय खेलकुद समितिका अध्यक्ष सशस्त्र प्रहरी अतिरिक्त महानिरीक्षक सिंहबहादुर श्रेष्ठले खेल सम्बन्धी प्रतिवेदन प्रस्तुत गर्नुहुँदै प्रतियोगिताको विविध पक्षबारे प्रकाश पारेका थिए ।

सशस्त्र प्रहरी अतिरिक्त महानिरीक्षक श्रेष्ठले सो प्रतियोगितामा विभिन्न विधाका खेलतर्फ गरी ४८ जना महिला खेलाडीसहित कूल २ सय ८५ जना खेलाडीहरुले सहभागिता जनाएको जानकारी गराए ।

सशस्त्र प्रहरी बल केन्द्रीय खेलकुद समितिको आयोजनामा संचालन भएको उक्त प्रतियोगितामा फुटबल, भलिबल लगाएत एथ्लेटिक्सका खेलहरु समावेश गरिएका थिए । सो प्रतियोगितामा सशस्त्र प्रहरी बल महानगरीय सशस्त्र प्रहरी कार्यालय, बराह बाहिनी, रुद्र बाहिनी, मुक्तिनाथ बाहिनी, महेश्वरी बाहिनी र वैद्यनाथ बाहिनी गरी कूल ६ टिमको सहभागिता रहेको थियो ।

बिजयी खेलाडीहरुलाई सशस्त्र प्रहरी अतिरिक्त महानिरीक्षकहरु कृष्णकुमार तामाङ, सिंहबहादुर श्रेष्ठ, प्रेमकुमार शाही, प्रकाश ओझा, शैलेन्द्र खनाल र जितबहादुर पुन लगाएत फुटबल संघका कार्यवाहक अध्यक्ष नरेन्द्र श्रेष्ठ, भलिबल संघका उपाध्यक्ष निरज मास्केले समेत पुरस्कार प्रदान गरेका थिए ।

समारोहमा सशस्त्र प्रहरी बलका बरिष्ठ अधिकृत लगाएत एपीएफ अधिकृत जवान एवं विभिन्न खेलकुद संघसंस्थाका प्रतिनिधिहरुको उपस्थिति रहेको थियो ।