सरकारद्वारा न्यायसेवाका पाँच जना सहसचिव सचिवमा बढुवा

६ माघ । सरकारले राष्ट्रिय किसान आयोग गठन गरेको छ । बिहीबार सिंहदरबारमा बसेको मन्त्रिपरिषद्को बैठकले किसान आयोग गठन गर्ने निर्णय गरेको हो । यस्तै सरकारले न्याय सेवा आयोगको सिफारिसमा पाँचजना सहसचिवलाई सचिवमा बढुवा गरेको सञ्चारमन्त्री कार्कीले जानकारी दिए  । 

सरकारले सहरजिस्ट्रार नकुल सुवेदीलाई न्यायपरिषद्को सचिवमा नियुक्त गर्नुका साथै सहरजिस्ट्रार नृपध्वज निरौलालाई सर्वोच्च अदालतको रजिस्ट्रारमा नियुक्त गरेको छ । सहरजिस्ट्रार राजीव गौतमलाई कानुन, न्याय तथा संसदीय मामिला मन्त्रालयको सचिवमा पदोन्नति गरिएको छ । त्यस्तै, सहन्यायाधिवक्ता राजनप्रसाद भट्टराईलाई बेपत्ता पारिएका व्यक्तिको छानबिन आयोगको सचिवमा पदोन्नति गरिएको पनि उनले जानकारी दिए । यस्तै, बैठकले सामाजिक संरक्षण र व्यक्तिगत घटना दर्ता कार्यक्रम सबलीकरणको लागि बिश्व बैंकले दिएको १६ अर्ब ३७ करोड रुपैयाँ ऋण सहायता स्वीकृत गरेको छ । प्राविधिक प्रमुख सेनानी खुमबहादुर कुँवरलाई प्राविधिक महासेनानीमा पदोन्नती गरेको छ भने नेपाल टेलिकम अथुरिटीमा रिक्त रहेको दुई सदस्य चयनका लागि सञ्चार मन्त्रालयका सचिवको संयोजकत्वमा तीन सदस्यीय समिति गठन गर्ने निर्णय भएको सञ्चारमन्त्री कार्कीले जानकारी दिए । काभ्रेमा केही साताअघि हत्या भएको भनिएका अजित मिजार र लक्ष्मी परियारको घटना छानबिन गर्न खेलकुद मन्त्री दलजीत श्रीपाइलीको संयोजकत्वमा मन्त्रिस्तरीय समिति गठन गरिएको छ । २०७१ सालको बाढीबाट प्रभावित बाँके, बर्दिया, दाङ, सुर्खेत र सिन्धुपाल्चोकमा निजी आवास पुनर्निर्माण अनुदान वितरणसम्बन्धी कार्यविधि-२०७३ स्वीकृत गरिएको छ । 

Comments