पुनर्निर्माणमा सुरक्षाकर्मीलाई सहभागी गराइने

समाचार

काठमाडौं, ७ माघ । भुकम्पपछिको पुनर्निर्माणमा सुरक्षाकर्मीलाई सहभागी गराउने प्रयास भइरहेको राष्ट्रिय पुननिर्माण प्राधिकरणका प्रमुख कार्यकारी अधिकृत सिइओ गोविन्द राज पोखरेलले बताउनुभएको छ । जनशक्ति व्यवस्थापन अहिलेको मुख्य चुनौती भएकाले नेपाली सेना र सशस्त्र प्रहरीलाई समेत पुनिर्माणको काममा लगाउने गरि सरोकारवाला निकायसंग समन्वय गरिरहेको पोखरेलले बताउनुभयो ।

न्युज–नेपालसँग कुरा गर्दै पोखरेलले सहकार्य र समन्वयको अभावमा पछिल्लो एक बर्षमा प्राधिकरणको काम सुस्त भएपनि पुनर्निर्माणको काम अव द्रुत गतिमा अघि बढ्ने दावी गर्नुभयो ।

कतिपय लाभग्राहीले पहिलो किस्ता वापत पाउने अनुदान रकम विभिन्न प्रक्रियागत झन्झटका कारण प्राप्त गर्न नसकेको जानकारी आएको भन्दै उहाँले घरको जग निर्माणका लागी अनुदान दिने बिषयलाई प्राधिकरणले पहिलो प्राथमिकता राखेको बताउनुभयो ।
उहाँले भुकम्पले क्षति पुगेका मुलुकका विभिन्न ऐतिहासिक धरोहरको मौलिकतालाई जोगाउँदै त्यसको पुननिर्माण गर्नेतर्फ प्राधिकरणले विशेष रुपमा ध्यान दिएको बताउनुभयो । पोखरेलले आउँदो बर्षा अघि नै भुकम्प पिडितहरुलाई आफ्नै घरमा फर्काउने गरि प्राधिकरणले काम गरिरहेको उल्लेख गर्नुभयो ।