१ अर्बको आवास गृह अमेरिकास्थित नेपाली दूतावासले किन्दै

समाज

वासिंटनडीसी । अमेरिकास्थित नेपाली दूतावासले आवासका लागि वासिंटनडीसीस्थित दूतावासको २० मिनेटको दुरी भित्र १ अर्व रूपैयाको आवास किन्ने प्रकृया अगाडि बढाएको छ। नेपाल सरकारसँग वासिंटनडिसीमा हाल एक दूतावासको कार्यालय र एक आवास भवन छन्। अर्को सुविधा सम्पन्न आवासका लागि दूतावासले खरिद प्रकृया अगाडि बढाएको हो।

दूतावासले १० हजार वर्गफिट भित्र बनेको ६ वटा बेड रूम, २ सय जनाका अट्ने रिसेप्सन हलसहितको अत्याधुनिक भवन खरिदका लागि बोलपत्र आवह्रान गरेको छ। नयाँ भवनमा मिडिया रूमसमेत हुनुपर्ने जनाइएको छ।

यसअघि तत्कालिन अमेरिकाका लागि नेपाली राजदूत डा. शंकर शर्माको पालामा पनि आवास किन्ने प्रकृया अगाडि बढाइएको थियो। क्यानडा, अमेरिका र युएनको दूतावास खरिदका लागि कमिटी समेत बनाइएको थियो। तर, खरिद प्रकृया अगाडि बढेको थिएन। ‘झन्झटिलो प्रकृया थियो। पैसा निकास गर्न पनि अफ्ट्यारो भएका कारण किन्ने प्रकृयासम्म पुगेकै थिएनौ,’ डा. शंकर शर्माले बताए।

दूतावासको कार्यालय रहेको भवन पुरानो र बिशिष्ट ब्यक्तिहरूलाई आमन्त्रण गर्न समेत लाजमर्दा भएको भन्दै तत्कालिन अमेरिकाका लागि नेपाली राजदूत शुरेस चालिसेले कार्यालय भवन किन्नुपर्ने प्रस्ताव नेपाल सरकारलाई गरेका थिए।

‘यो भन्दा पहिले बरू कार्यालय नै किनौ भन्ने प्रस्ताव आएको थियो। यसपाली आवास किन्ने भनेर प्रस्ताव आयो। ८ मिलियन देखि १० मिलियन डलर लाग्ने प्रस्ताव आए लगत्तै अर्थले बजेट निकास गरेको थियो। परराष्ट्रले दूतावासलाई प्रकृया अगाडि बढाउन निर्देशन दिएको हो,’ नेपालस्थित परराष्ट्र मन्त्रालयका एक अधिकारीले खरिद प्रकृया अगाडि बढेको पृष्टि गर्दै भनेका छन्।

यसबारे अमेरिकास्थित दूतावाससँग प्रतिक्रिया लिन खोज्दा फोन सम्पर्क हुन सकेको छैन। अहिले दूतावासमा ७ जना डिप्लोम्याट तहका कर्मचारी, तीन जना चालक र तीन जना सहायक कर्मचारी गरी जम्मा १३ जना कर्मचारी कार्यरत छन्।

‘अमेरिकामा आवास किन्ने योजना सुरू गरेको एक दशक बिते पनि कसैले आँट गर्न सकेको थिएन,’ स्रोतले भन्यो, ‘कमिसनका कुरा मुछिएपछि अहिलेसम्म आवास किन्ने कुरा अगाडीl बढेको थिएन।’

तत्कालिन राजदूत शंकर शर्माले पनि प्रकृया अगाडीl बढाउन खोजे पनि क्यानाडाका तत्कालिन राजदूत भोजराज घिमिरेले ‘अखित्यारको लफडा आइपर्छ नगरौँ’, भन्ने सल्ला लगत्तै प्रकृया अगाडी बढेको थिएन।

अमेरिकाका पूर्व राष्ट्रपति बाराक ओवामा हाल बस्ने गरेको घरको मुल्य ७० लाख डलर को हो। नेपाली दूतावासले किन्ने भनिएको आवासको मुल्य १ करोड डलर हो।