सुरक्षाको कारण ग्यालेक्सी नोट एटमा पनि अनस्क्रिन फिंगरप्रिन्ट स्क्यानर नहुने

सूचना प्रविधि

काठमाडौं, २८ जेठ । सामसुंग ग्यालेक्सी नोट एटमा अनस्क्रिन फिंगरप्रिन्ट नहुने भएको छ । आगामी फ्लागसीप फ्याब्लेट यो अंग्रेजी वर्षको अन्त्यसम्ममा सार्वजनिक हुने बताइएको छ । र, यदि पछिल्लोपटक अन्तर्राष्ट्रिय संचारमाध्यममा आएका खबरहरु पत्याउनेहो भने यो फ्याब्लेटको डिस्प्ले अर्थात् अनस्क्रिन फिंगरप्रिन्ट स्क्यानर हुने छैन ।

सामसुंगका एकजना कार्यकारीले भनेका छन्ः हामीले ग्यालेक्सी नोट एटमा डिस्प्लेमै फिंगरप्रिन्ट स्क्यानर राख्नका लागि भरमग्दुर प्रयास गर्यौँ । तर सुरक्षा लगायतका विभिन्न खाले प्राविधिक सीमाहरुका कारण अन्त्यमा यो रणनीतिक फोनको डिस्प्लेमा फिंगरप्रिन्ट स्क्यानर नराख्ने निर्णय गरियो ।

यसको अर्थ कम्पनीले नोट एटको कम्तीमा एउटा प्रोटोटाइपमा अनस्क्रिन सेन्सर प्रविधिको प्रयोग गरेको तर यसले राम्रोसँग काम नगरेपछि त्यसलाई प्रयोग नगर्ने निर्णय गरेको हुनसक्छ ।

ग्यालेक्सी नोट एटमा यो प्रविधि प्रयोग नगरेतापनि सामसुंगले अनस्क्रिन फिंगरप्रिन्ट स्क्यानर प्रविधिको विकाशका लागि बायोमेट्रिक सेन्सर प्रविधि निर्माता कम्पनी क्रुसल टेकसँगको सहकार्यमा काम गरिरहने बताइएको छ ।

ग्यालेक्सी नोट एटमा दुईवटा मुख्य क्यामरा हुने बताइएको छ । साथै यसमा क्वालकोम स्नापड्रागन ८३५ प्रोसेसर, ६ जिबीको र्याम हुने बताइएको छ । एजेनसी