नारायणगढ-मुग्लिन सडकमा सवारी चलाउन रोक, नवलपरासीको दाउन्नेमा पहिरो जाँदा सडक अबरुद्ध

समाचार

नवलपरासी, २० साउन । नवलपरासीको दाउन्नेमा पहिरो जाँदा सवारी आवागमन ठप्प भएको छ । तीन दिनदेखिको लगातारको वर्षाले दाउन्नेको एस मोडमा गएराति ठूलो पहिरो गएको हो । पहिरोले अवरुद्ध सडक खुलाउने प्रयास भइरहेको बर्दघाट प्रहरीले जनाएको छ । पहिरो हटाई यातायात सुचारु गराउनका लागि रातिदेखि नै सडक डिभिजन कार्यालयको डोजरले काम गरे पनि पानी परिरहेको र पहिरो खसिरहेका कारण पहिरो हटाउन समस्या भएको प्रहरीले जनाएको छ ।

पूर्व–पश्चिम राजमार्गअन्तरगत दाउन्नेमा रहेको प्रहरी बिटदेखि करिब ५० मिटर पश्चिमको भागमा वर्षाको कारण पहिरो खस्दा यातायात अबरुद्ध भएको हो । बिहीबार राति साढे १२ बजेतिर पहिरो खसेपछि सवारी साधन तथा यात्रुहरु ८ घन्टादेखि अलपत्र छन् ।

नारायणगढ-मुग्लिन सडकखण्डमा गाडी चलाउन रोकः
यस्तै विभिन्न ठाउँमा ठूलो पहिरो खसेपछि नारायणगढ-मुग्लिन सडकखण्डमा गाडी चलाउन रोक लगाइएको छ । मुग्लिनदेखि गाईघाटसम्म १० ठाउँमा ठूलो पहिरो खसेको तथा केही ठाउँमा सडक नै बगाएकाले गाडी चलाउन रोक लगाइएको नारायणगढ मुग्लिन सडक निर्माण आयोजनाले जनाएको छ ।

बिहीबार बेलुकी एक घण्टा एकतर्फी खुलाएर बाटोमा रोकिएका गाडी पठाएपछि जोखिम रहेको भन्दै अरु गाडी चलाउन रोक लगाइएको प्रहरीले जनाएको छ । अहिले पनि पानी परिरहेकाले पहिरो पन्छाउन समस्या भएको चितवन प्रहरीले जनाएको छ । सबैतिरको पहिरो पन्छाएपछि मात्र गाडी चल्न दिईनेछ ।