खाल्डोमा डुबेर बालिका ज्यान गुमाएका बालिकाहरुको शव सडकमा राखेर विरोध प्रदर्शन

समाचार

रौतहट, २२ साउन । सडक निर्माणका क्रममा खनिएको खाल्डोमा डुबेर मृत्यु भएका बालिकाहरुका आफन्तले प्रर्दशन सुरु गरेका छन् । मृतकका आफन्त, परिवार र स्थानीयले आईतबार बिहानदेखि नै रौतहट गरुडा नगरपालिकास्थित इलाका प्रहरी कार्यालय अगाडि शव सडकमा राखेर सडक क्षेत्र अवरुद्ध गरेका हुन् । शनिबार खाल्डोमा परेर चार बालिकाको मृत्यु भएको थियो।

पीडित परिवारले सडक डिभिजन कार्यालय र ठेकेदार कम्पनीको लापरबाहीको कारण बालिकाहरुको मृत्यु भएको भन्दै क्षतिपूर्ति माग गरेका छन्। पीडित परिवारले दोषीलाई कारबाहीको माग समेत गरेका छन्। आफ्ना माग पूरा नभएसम्म बालिकाको अन्तिम सस्कार नगर्ने र प्रर्दशन जारी राख्ने उनीहरुले बताएका छन्। प्रर्दशनको कारण सवारी आवागमन र बजारक्षेत्र प्रभावित बनेको छ।

शनिबार दिउँसो घाँस काटेर फर्किने क्रममा गर्मी भएकाले खाल्डोमा नुहाउँने क्रममा डुबेर गरुडा नगरपालिका–४ स्थित स्थानीय राम एकवाल साहकी दुई छोरी १२ वर्षीया सुनीता साह र ९ वर्षीया संगीता साहको निधन भएको थियो। यस्तै स्थानीय प्रेम साहकी ९ वर्षीया छोरी सुस्मिता साह र योगेन्द्र साहकी ९ वर्षीया छोरी सुनैना साहको पनि मृत्यु भएको थियो।