रौतहटमा सेफटी ट्याङ्कीमा निस्सासिएर घरबेटीसहित तीनजनाको मृत्यु

समाचार

रौतहट, ११ असोज । रौतहटमा सेफटी ट्याङ्कीमा निस्सासिएर तीन जनाको ज्यान गएको छ । यमुनामाई गाउँपालिका १ सुकदेवचोकमा नयाँ घर निर्माण भइरहेका बेला सेफ्टी ट्याङकीमा निस्सासिएर घरबेटीसहित दुई कामदारको ज्यान गएको हो । सेफटी ट्याङ्की सफा गर्ने क्रममा घरबेटी परोहा नगरपालिका २ का ३५ वर्षका अजय कुमार बैठा, परोहा १ बस्ने ३१ वर्षका विजय बैठा, देवाहीगुनाही नगरपालिकाका ३० वर्षका नागेश्वर माझीको ज्यान गएको प्रहरीले जनाएको छ ।

अजय कुमार बैठा आफ्नो घरमा निर्माणाधिन शौचालयको ढलान पछिको काठ हटाउन विजय र नागेश्वरसँग ट्यांकीभित्र छिरेका थिए । ट्यांकी भित्र पसेका विजय बैठा र नागेश्वर माझी धेरैबेरसम्म बाहिर ननिस्किएपछि घरपट्टी अजय बैठा पनि ट्यांकी भित्र पसेका थिए । तीनै जनाको ट्यांकी भित्र बेहोस भएको भन्ने हल्ला भएपछि प्रहरीले उद्धार गर्न खोजेको थियो तर ट्यांकी भित्र पसेको प्रहरी नै निस्सासीन थालेपछि डोजरको मद्दतले पर्खाल भत्काएर तीन जनालाई बाहिर निकालिएको थियो ।

उनीहरुलाई उपचारका लागि जिल्ला अस्पताल गौर ल्याइए पनि चिकित्सकहरुले मृत घोषित गरेका थिए । तिनै जनाको शव पोष्टमार्टमका लागि जिल्ला अस्पताल गौरमा राखिएको छ । ट्यांकी भित्र पसेका तिनै जनाको अक्सीजनको कमी भएर निस्सासीएर ज्यान गएको जिल्ला प्रहरी कार्यालय रौतहटले जनाएको छ ।