ज्येष्ठ नागरिकलाई न्यानो कम्बल

डोल्पा, २ पुस । स्थानीय तहको निर्वाचन सम्पन्न भएको झण्डै सात महिनापछि बल्ल त्रिपुरासुन्दरी नगरपालिकाको १ नं वडा कार्यालय औपचारिक रुपमा सञ्चालनमा आएको छ । वडा कार्यालय निश्चित ठाउँमा नहुँदा वडा नं १ का नागरिकहरु वडा सचिव र अध्यक्षलाई भेट्न सार्वजनिक बाटो र होटल चाहार्दै हिँड्नु परेको अवस्थामा कार्यालय सञ्चालनमा ल्याइएपछि सरकारी सेवा लिनलाई सर्वसाधारणलाई सहज हुने आशा गरिएको छ ।

एघार वटा वडा रहेको त्रिपुरासुन्दरी नगरपालिकाका अन्य १० वटा वडामा औपचारिक रुपमा वडा कार्यालय सञ्चालनमा आउन सकेका छैनन् । सबै वडाका अध्यक्ष तथा सचिवले अनौपचारिक रुपमा सम्पूर्ण सरकारी सेवा सुविधा सम्बन्धित वडाबाटै दिइरहेको र आउने फागुन महिनाभित्रै १० वटै वडामा औपचारिक रुपमै कार्यालय स्थापना गरेर सेवालाई प्रभावकारी बनाइने नगरपालिकाका प्रमुख प्रशासकीय अधिकृत हीराचन्द्र धरालाले बताउनुभयो ।

वडा कार्यालयको उद्घाटन गर्दै प्रमुख ओमबहादुर बुढाले निर्वाचित प्रतिनिधिहरुलाई कोही कसैलाई आग्रह पूर्वाग्रह नराखी सर्वसाधारणलाई सेवा प्रवाह गर्न आग्रह गर्नुभयो । वडा कार्यालय उद्घाटनको अवसर पारेर वडा नं १ भित्रका ७० वर्ष पुगेका २५ महिला र १७ पुरुष गरी ४२ वृद्धवृद्धालाई सम्मानस्वरुप न्यानो कम्बल वितरण गरिएको थियो ।

७५ वर्षीय वृद्ध विष्णुरुद्र उपाध्यायले आफूहरुलाई सम्मानस्वरुप पटक पटक न्यानो कपडा कम्बल र भत्तासमेत दिन थालेपछि जीवन निर्वाहमा सहज भएको बताउनुभयो । एकल महिला चाउरी सर्केनीले आफ्ना पति परलोक भएको नौ वर्ष भएको र आफ्ना छोराबुहारीले अनेक गालीगलोज गरिरहेका बेला सरकारले उपलब्ध गराउँदै आएको वृद्धभत्ता र कम्बलले आफूलाई एक्लो महसुस नभएको बताउनुभयो ।

सो अवसरमा साविकको गाविस हुँदाको अवस्था र हालको नगरपालिकाको संरचना हुँदा पनि लामो समयसम्म जनता र कार्यालयको काममा उत्कृष्ट सेवा गरेबापत वडाका सहायक लेखापाल हरिचन्द्र हमाल र कार्यालय सहयोगी देवसिंह थापालाई दोसल्ला ओढाएर सम्मान गरिएको थियो । रासस

Comments