सुन तस्करी प्रकरण वरिष्ठ अधिवक्ताको ‘असंगत’ काम

समाचार

बहुचर्चित सुन तस्करी प्रकरणमा वरिष्ठ अधिवक्ता रमण श्रेष्ठले गत वर्ष महान्यायाधिवक्ताको हैसियतमा सरकारी पक्षबाट मुद्दाको प्रतिरक्षा गर्दै बहस गरे, आरोपितहरूमाथि कठोर सजाय मागदाबी गरे ।

पछिल्लो ३३ किलो तस्करीको सुन त्रिभुवन विमानस्थलबाटै गायब पारिएको र खोज्ने क्रममा भएका हत्यासम्बन्धी मुद्दामा भने उनी कानुन व्यवसायीको हैसियतमा आरोपितका पक्षमा उभिए । आरोपितको कानुुनी प्रतिरक्षा गरे ।

फरक–फरक समयमा दायर यी दुई मुद्दाका विषय एउटै हो– संगठित सुन तस्करी । अझ कतिपय प्रतिवादी दुवै मुद्दामा उही छन् । विशेष अनुसन्धान समितिले पनि यी घटनालाई ०६९ देखिकै शृंखला भएको दाबी गरेको छ । यसरी उही प्रकृतिको, प्रतिवादीसमेत उही रहेका मुद्दामा कानुन व्यवसायीले वादी र प्रतिवादी दुवै पक्षबाट बहस गर्न मिल्छ रु पूर्वमहान्यायाधिवक्ता बद्रीबहादुर कार्की महान्यायाधिवक्ताले आफ्नो कार्यकालमा दर्ता भएका कुनै पनि मुद्दामा पदबाट हटेपछि विपक्षबाट बहस गर्नु उचित नहुने बताउँछन् ।

‘मैले आफूले नियुक्ति पाएदेखि अवकाश पाएको मितिसम्म दायर भएका कुनै पनि सरकारवादी मुद्दाको विपक्षमा मुद्दा हेरिनँ, त्यससँग जोडिएका अरू मुद्दा पनि हेर्ने कुरा भएन,’ कार्कीले कान्तिपुरसँग भने, ‘मैले मलाई लागेको कुरा गरेँ, मेरो नियम सबैले मान्नुपर्छ भन्ने छैन । अरूका हकमा त अरूलाई नै सोध्नुपर्ला ।’

कान्तिपुर दैनिक