३३ किलो सुन तस्करीमा संलग्न एसएसपी खत्रीसहित ७ जनाविरुद्ध रेड कर्नर नोटिस जारी गर्ने तयारी

समाचार

काठमाडाैं,११ जेठ । ३३ किलो सुन तस्करी प्रकरणमा मुछिएका प्रहरी वरिष्ठ उपरीक्षक (एसएसपी) श्याम खत्रीसहित ७ जनाविरुद्ध अन्तर्राष्ट्रिय प्रहरी संगठन (इन्टरपोल) मा रेड कर्नर नोटिस जारी गर्ने तयारी गरिएको छ ।

गायब भएको साढे ३३ केजी सुनका लगानीकर्ता भनिएका मोहनकुमार अग्रवाल, सुन तस्करी प्रकरणमा प्रतिवादी बनाइएका सुनिल अग्रवाल, मुख्य अभियुक्त चुडामणि उप्रेती ‘गोरे’ का भाइ रमेश उप्रेती, बाजेको सेकुवा कर्नरका सञ्चालक चेतन भण्डारी, हरिशरण खड्का र छिरिङ बाङ्गेल गुरुङविरुद्ध रेड कर्नर नोटिस जारी गर्ने तयारी गरिएको प्रहरी उच्च स्रोतले जनाएको छ।

सुन काण्डका मुख्य अभियुक्त भनिएका गोरेले आफूलाई सुन तस्करीमा सघाउने प्रहरीलाई बुझाएको रकमको लिस्टमा खत्रीको पनि नाम रहेको र उनले पटकपटक गरेर १ करोड १२ लाख रकम लिएको भेटिएको छ । तस्करीमा संलग्न अन्य अभियुक्तले पनि उनको नाम लिएका छन् । एसएसपी श्याम खत्री र अन्य ७ जना अहिले सम्म फरार छन् ।