विप्लव र सीके राउत देशको मुख्य सुरक्षा चुनाैती रहेको सेनाको विश्लेषण

गतिविधि

काठमाडौं १४, जेष्ठ । देशमा स्थायित्व कायम हुनै लाग्दा विभिन्न किसिमका आन्तरिक सुरक्षा चुनाैती रहेको सेनाको ठम्याई छ ।

नेपाली सेनाले मुलुकको सुरक्षा चुनाैतीका रुपमा नेत्रविक्रम चन्द ‘विप्लव’ नेतृत्वको नेकपा र तराई क्षेत्रमा सीके राउत समूहलाई मुख्य मानेको छ ।

आइतबार र सोमबार दुईसम्म चलेको नेपाली सेनाको पृतनापति समन्वयात्मक बैठकमा विभिन्न पृतनाको कमाण्ड गरिरहेका उच्च सैनिक अधिकारीहरुले विप्लवका गतिबिधि हिंसात्मक दिशामा गएको रिपोर्ट गरेको स्रोतले जनाएको छ ।

सैनिक अधिकारीहरुले विप्लव समूहलाई सरकारले कसरी व्यवहार गर्छ भन्ने प्रष्ट हुनुपर्ने सुझावसमेत दिएका थिए ।

बैठकमा मुलुकको समग्र सुरक्षा अवस्थाबारे छलफल भएको थियो । पृतनापति सम्मेलनलाई समापन गर्दै प्रधानसेनापति राजेन्द्र क्षेत्रीले विद्यमान परिस्थितिको मुल्यांकन गर्दै सम्भावित चुनौतीको सामना गर्न तयारी अवस्थामा रहन मातहतलाई निर्देशन दिएका छन् ।

प्रधान सेनापतिले नेपाली सेनाका अपरेसनल, तालिम तथा बन्दोबस्तीका पक्षमा हरहमेसा तयारी रहन निर्देशन दिएको सैनिक जनसम्पर्क निर्देशनालयले जनाएको छ ।

नेपाली सेनाका विभिन्न विभागीय प्रमुख र पृतनापतिहरुको सहभागिता रहेको बैठकमा सुरक्षाका समग्र विषयमा छलफल भएको बताइएको छ ।