के गर्लान रवि लामिछाने, प्रेस काउन्सिलका पदाधिकारिलाई जथाभावी लेख्ने दुईजना पक्राउ

टेलिभिजन कार्यक्रम प्रस्तोता रवि लामिछानेका पक्षमा वकालत गरेका मानिसहरु समातिदा उनले के गर्छन, त्यो अब चासाेकाे बिषय बन्न पुगेको छ ।

समाचार

- अर्धचेतन

काठमाडौं १३, असार । पछिल्लोसमय बढेको सामाजिक संजालको प्रयोग र न्युज २४ बाट प्रशारण हुने कार्यक्रम ‘सीधा कुरा जनतासँग’का कार्यक्रम प्रस्तोता रवि लामिछानेको पक्षमा उभिएर फेसबुकमा लेखेको स्टाटसले दुईजनालाई प्रहरीकहाँ पुर्याएको छ ।

नेपाल प्रेस काउन्सिलका पदाधिकारीलाई सामाजिक सञ्जालमा ज्यान मार्ने धम्की दिनुका साथै आपत्तिजनक, अमर्यादित शब्दहरु प्रयोग गरी पोस्ट र कमेन्ट गरेको पाइएको प्रहरीले जनाएको छ ।

महानगरीय अपराध महाशाखाले इलाम घर भई ललितपुरको बागडोल बस्ने ५० वर्षका विनोद गौतम र नवलपरासी सुनवल नगरपालिकाका ३६ वर्षका विष्णु ढकाललाई पक्राउ गरेको हो ।

लामिछानेले आफ्ना फ्यानहरुलाई आवेगमा आएर नबोल्न, जथाभावी नलेख्न सचेत नगराएकै भरमा उनीहरु कानुनको दायरामा परेका छन् । लामिछानेलाई उनको पक्षमा उर्लिएको जनसागरको कुनै महत्व थिएन वा उनी लिडर बन्न नजानेर निडर बन्ने कोसिस गरे त्यो भने समयले नै देखाउला । तर, यतिबेला लामिछानेका पक्षमा उभिएका कयाै मानिसहरु कानुनी दायरामा पर्ने देखिएको बेला उनले यसको जिम्मा लिने आट गर्लान त ?

प्रहरीका अनुसार उनीहरुले काउन्सिलका पदाधिकारीहरुको व्यक्तिगत जीवन तथा मान प्रतिष्ठासमेतमा आघात पुर्‍याउने र ज्यान मार्ने धम्की दिएर सामाजिक सञ्जालमा स्टाटसहरु लेखेका थिए ।

मंगलबार प्रहरीले गौतमलाई काठमाडौंको टेकुबाट र ढकाललाई नवलपरासीको सुनवलबाट पक्राउ गरिएको महाशाखाका प्रहरी उपरीक्षक (एसपी) नरेन्द्र उप्रेतीले बताए ।

उनीहरुलाई विद्युतीय कारोबार ऐन अन्तर्गत अनुसन्धान कारवाहीको लागि बुधबार महानगरीय प्रहरी परिसर, काठमाडौमा पठाइएको अपराध महाशाखाले जनाएको छ ।

विद्युतीय कारोबार ऐन २०६३ को दफा ४७ बमोजिम यस्तो कार्यमा संलग्नलाई एक लाख रुपैयाँसम्म जरिवाना वा पाँच वर्षसम्म कैद सजायँ वा दुबै सजाय हुने व्यवस्था छ ।