३३ किलो सुन र सनम शाक्य हत्याबारे यस्ताे भन्छन् प्रहरी प्रमुख

समाचार

काठमाडौं,१४ असार । प्रहरी महानिरीक्षक सर्वेन्द्र खनालले साढे ३८ क्वीन्टल सुन तस्करीका विषयमा भइरहेको अनुसन्धानबारे आफूले केही नबोल्ने बताएका छन् ।

प्रहरी प्रधान कार्यालयमा बिहीबार पत्रकार सम्मेलन गरेका उनले सुन काण्डबारे अनुसन्धान गर्न गृह मन्त्रालयले छुट्टै समिति गठन गरेकाले आफूले यसबारे टिप्पणी नगर्ने बताएका हुन् ।

घटनाको अनुसन्धानका लागि सरकारले छुट्टै समिति बनाएको छ र सोही समितिले अनुसन्धान गर्दै आइरहेको हुनाले आफ्नो क्षेत्राधिकारको बाहिरको कुरा भएकोले यसबारे केहि नबोल्ने बताएका छन् । उनले प्रहरी नेतृत्व आफूले समाल्नु अघिनै सरकारले विज्ञको सहभागिता गरेर समिति बनाएको भन्दै उक्त समितिलाई आफूले कुनै निर्देशन दिन नमिल्ने समेत स्पष्ट पारे।

साढे ३३ किलो सुन गायव भएको भन्दै खोज्ने क्रममा सनम शाक्यको हत्या भएपछि घटना बाहिर आएको थियो। घटनाको अनुसन्धान गर्दै जाँदा प्रहरीकै मिलेमतोमा विमानस्थलबाट सुन नेपाल भित्रने गरेको तथ्य बाहिर आएको थियो। प्रहरीको सेटिङमा सुन तस्करी हुने गरेको तथ्य बाहिरिएसँगै उच्च पदस्थ प्रहरी अधिकृतहरु पक्राउ परेका हुन्।