रोजगारीका लागि अब विदेशिनु पर्दैन : मन्त्री विष्ट

समाचार

काठमाडौँ । बाध्यताको वैदेशिक रोजगार पाँच वर्षसम्म मात्र रहने श्रम तथा रोजगार मन्त्री गोकर्ण विष्टले बताएका छन् । राजधानीबाट प्रकाशित हुने एक राष्ट्रिय दैनिकलाई अन्तर्वार्ता दिंदै मन्त्री बिष्टले उक्त कुरा बताएका हुन् ।

पाँच वर्षभित्र बैदेशिक रोजगारका लागि बाहिर जाने बाध्यता कम गर्ने तयारी सरकारले गरेको मन्त्री विष्टले बताए । उनले भने,‘ गुणस्तरीय रोजगारीका लागि आफ्नो चाहाना/इच्छाले रोजगारका लागि बाहिरिनेलाई रोक्न सकिन्न । यो विश्वव्यापी प्रविधि र संस्कृति नै हो । तर रोजगारीका लागि नै बाहिरिनु पर्ने अवस्थाको भने अन्त्य हुन्छ ।’

बैदेशिक रोजगारीलाई सुरक्षित र व्यवस्थित र भरपर्दो बनाउन समय लागेकाले मलेसियामा श्रमिक पठाई हाल्न नसकिएको मन्त्री विष्टको भनाई छ । बैदेशिक रोजगारमा जाने क्रममा विभिन्न तरिकाबाट ठगीएकाहरूलाई उजुरी गर्नको लागि जिल्ला प्रशासन कार्यलय मै उजुरी दर्ता गर्न मिल्ने व्यवस्था मिलाउने मन्त्री विष्टले बताए ।

नेपालको जनशक्तिले नेपालमा नै काम गर्न पाउन भन्ने चाहाना रहेको छ । मन्त्री विष्टले थपे, ‘नेपालको जनशक्ति अभिमुखीकरण नगर्ने तर प्रमाणपत्र बेच्ने प्रवृत्ति छ, अब त्यो फेरिन्छ ।’ बैदेशिक रोजगार कम गर्नाको लागि आन्तरिक स्देशमै रोजगारी सिर्जनाको वातावरण सरकारले गराउँछ । सरकारले सञ्चालन गरेको आयोजनालाई समयभित्र सम्पन्न गर्नेगरी श्रमिक थप्ने योजना बनाईएको मन्त्री विष्टले बताए ।