गृहका कर्मचारीलाई कार्यलय समयमा अनिवार्य योग गर्न निर्देशन

निजामती

- न्युज नेपाल

काठमाडौं । गृह मन्त्रालयले मातहतका कर्मचारीलाई कार्यलय समयमा अनिवार्य रुपमा योग गर्न निर्देशन गरेको छ।

यसका लागि गृहले मातहतका कर्मचारीका लागि परिपत्र नै जारी गरेको छ । परिपत्रअनुसार मातहतका अधिकृत तहका कर्मचारीलाई कम्तीमा १५ मिनेट योग गर्न भनिएको छ । योग गर्ने समय भने १० देखी १०ः१५ बजेसम्म निर्धारण गरिएको छ । जुन कार्यलय सुरु हुने समय हो । र, सोही समयमा सेवाग्राहीको सम्बन्धित कार्यलयमा घुइँचो लाग्ने गर्छ ।

पूर्वसचिव उमेश मैनालीले कार्यालय समयमा महत्तवपूर्ण निकायका कर्मचारी योग अभ्यासमा लाग्नु गलत रहेको बताए । १० बजेदेखि कार्यलय समय सुरु हुन्छ । यो सेवाग्राहीका लागि छुट्याइएको समय हो । उक्त समयमा सेवाग्राहीलाई कर्मचारीले सेवा दिनुपर्छ । तर, सोही समयमा कर्मचारी योग अभ्यासमा लाग्दा सेवाग्राही मारमा पर्छन् । कार्यलय समयमा योगभ्यास गर्नु ठीक होइन् ।

गृहको कार्यलय व्यवस्थापन तथा जिन्सी शाखाबाट जारी भएको परिपत्रअनुसार योगाभ्यास अधिकृत तहका कर्मचारीका लागि अनिवार्य गरिएको छ। योगाभ्यास बिहानको १०ः१५ अघि गरिसक्नुपर्ने परिपत्रमा उल्लेख छ ।

अधिकृतभन्दा तल्लो तहका कर्मचारीलाई पनि योग अभ्यासको तालिम दिई कार्यलय समयभन्दा अघि अभ्यास गराउने वातावरण तयार गर्न परिपत्रमा भनिएको छ । तर गृहले यस सम्बन्धमा आफ्नो धारणा सार्वजनिक गरेको छैन् । मन्त्रालयका प्रवक्ताको जिम्मेवारीसमेत सम्हालेका प्रशासन महाशाखाका प्रमुख सहसचिव केदारनाथ शर्माले यस विषयमा पछि बोल्ने भन्दै पन्छिए ।