वृद्धा हत्याको आरोपमा एक युवक पक्राउ

अपराध

काठमडौं । धादिङमा ८६ वर्षीया वृद्धा हत्याको आरोपमा एक युवालाई प्रहरीले पक्राउ गरेको छ ।

युवकलाई जिल्लको सिद्धलेक गाउँपालिका वडा नम्बर ६ सिम्लेमा ८६ वर्षीया वृद्धाको हत्या गरेको आरोप लागेको छ । बुधवार राति अन्दाजी ११ बजे तिर ८६ वर्षीया सुन्तलीमाया घलेको हत्या भएको इलाका प्रहरी कार्यालय गजुरीका प्रमुख डिएसपी डिल्लीनारायण पाण्डेले जानकारी दिए ।

हत्या भएको खबर पाए लगत्तै डिएसपी पाण्डेको नेतृत्वमा प्रहरी परिचालन गरी हत्यामा संलग्नलाई खोनि गरिएको थियो । नीलकण्ठ नगरपालिका वडा नम्बर–८ को मैदी भन्ज्याङबाट भाग्दै गरेको अवस्थामा बिहीबार बिहान गोर्खा आरुघाट गाउँपालिका निवासी २९ वर्षीय विजय श्रेष्ठलाई प्रहरीले पक्राउ गरेको हो ।

गोर्खाबाट धादिङको सिद्धलेक गाउँपालिकास्थित सिम्लेमा आफन्तको घरमा गएको बेला छिमेकी सुन्तलीमायालाई राति आफन्त लालबहादुर घलेको बारीमा लगी हत्या गरेर छाडिदिएको प्रारम्भिक बयानमा विजयले बताएको प्रहरीले जानकारी दिएको छ ।

हत्याको कारण भने खुल्न सकेको छैन । युवकलाई थप अनुसन्धानका लागि इलाका प्रहरी कार्यालय गजुरीमा राखिएको प्रहरीले जनाएको छ ।