रेलभित्रै युवतीले मेकअप गर्न थालेपछि…

टोकियो/यात्रा गर्ने क्रममा सार्वजनिक सवारीसाधनभित्रै मेकअप गर्न मिल्छ कि मिल्दैन ? यसबारे विभिन्न मानिसका विभिन्न धारणा होलान् । तर, जापानको एक रेल कम्पनीले भने यसलाई अस्वीकार गरेको छ । यस्तो कार्य निरुत्साहित गर्न उसले भिडियो सार्वजनिक गरेको छ ।

रेलभित्र जथाभावी मेकअप गर्ने यात्रुलाई हतोत्साहित गर्न रेलसेवा प्रदायक कम्पनी टोक्यू कर्पले भिडियो सार्वजनिक गरेको हो । कम्पनीको योजना रेलभित्र अशोभनीय हर्कत निरुत्साहित गर्ने रहेको जनाइएको छ । ३० सेकेन्ड लामा ती भिडयो यसरी सुरु हुन्छन्, ‘सहरका महिला साह्रै सुन्दर छन् । तर, उनीहरू बारम्बार कुरूप देखिन खोज्छन् ।’

मेकअप गरेका महिलालाई देख्दा जापानी नायिका सावा निमुरा आक्रोशित हुन्छिन् र अगाडि भन्छिन्, ‘रेलमा मेकअप गर्न छाड्नुहोस् ।’ अर्को भिडियोमा दुई महिलायात्रुले रेलभित्रै लिपिस्टिक र आइलेस लगाएको र अर्की महिलाले ‘कस्ती कुरूप’ भन्दै कानेखुसी गरेको देखिन्छ ।

मेकअपले रेलभित्रको वातावरण बिग्रिएको भन्दै मेकअप गर्ने महिलासँग अर्की एक महिला झर्किएको पनि देखिन्छ । भिडियोबारे सामाजिक सञ्जालमा असन्तोष पोखिन थालेका छन् ।

‘रेल कम्पनीको कुरा म स्पष्ट बुझ्छु । रेलमा मेकअप गर्दा पाउडर छरिन सक्छ, अत्तरको कडा गन्धले यात्रा गरिरहेका अन्य मानिसलाई असर गर्न सक्छ,’ एक ट्विटर प्रयोगकर्ता भन्छन्,  रेल कम्पनीले निर्देशन दिन मिल्दैन,’ उनी भन्छन् । ‘रेलमा मेकअप गर्न पाएनौँ भनेर यात्रुहरू कत्ति रिसाएका छैनन्,’ उनी थप्छन् ।

हिनासी नाम गरेका व्यक्ति ट्विट गर्छन्, ‘भिडियोमार्फत रेल कम्पनीले महिलालाई घृणित पात्रका रूपमा व्याख्या गर्न खोजेको छ ।’  रेलमा मेकअपभन्दा यौन दुव्र्यवहार र जाँड खाने समस्या  ठूलो भएको केहीले टिप्पणी गरेका छन् ।

तर, केहीले रेल विज्ञापनको स्वागत गरेका छन् । रेलभित्र मेकअप गर्नुु भनेको शौचालयमा शौच गर्नुबराबर भएको एक ट्विटर प्रयोगकर्ताको  भनाइ छ । सार्वजनिक स्थानमा मेकअप गर्ने महिलाको चरित्रमाथि नै प्रश्न गर्नुपर्ने वेला आएको केहीको प्रतिक्रिया छ ।

केहीले भने रेलमा मेकअप गर्नु निजी विषय भएको तर्क गरेका छन् । ‘पश्चिमा समाजमा सार्वजनिक रूपमा मेकअप गर्नुलाई वेश्यापनसँग जोडिन्छ । तर, बेलायतकी महारानी एलिजाबेथ द्वितीय भने सार्वजनिक स्थलमै आफ्नो लिपिस्टिक छुने कार्यका लागि प्रख्यात छिन्,’ पापुरिका ड्रिम्स ट्विट गर्छिन्  ।

रेल प्रयोग गर्दा यात्रुहरूले पालना गर्नुपर्ने नियमबारे जानकारी दिन र अन्य यात्रु हिँडिरहेको समयमा स्मार्ट फोन प्रयोग गर्ने तथा ब्याग बोकेर अन्य यात्रुलाई सास्ती दिने महिलाई  निरुत्साहित गर्न भिडियो निर्माण गरिएको कोर्पले जनाएको छ ।

Comments