भारतीय पक्षले निमार्ण गरेको कुलो सशस्त्र प्रहरीले पुर्न लगायो

समाज

- बिमला सापकोट / न्युज नेपाल

गुलरिया । बर्दियाको मधुवन नगरपालिका ५ मा दशगजा मिचेर भारतीय पक्षले निमार्ण गरेको कुलो सशस्त्र प्रहरीले पुर्न लगाएको छ ।

भारतीय वन विभागका कर्मचारीहरुले खनेको कुलो नेपालको सशस्त्र प्रहरी सीमा सुरक्षा बल सानोश्रीले पुर्न लगाएको हो ।

कतर्निया वन्यजन्तु आरक्ष भारतका कर्मचारीले सीमा स्तम्भ ७५ र ७६ को बीचमा स्काभेटरले झन्डै २० मिटर लामो कुलो खनेका थिए । दशगजा मिचेर कुलो खनिएपछि विवाद भएको थियो ।

‘उनीहरुले खनेको भूभाग भारतमा पर्ने दाबी गरेका थिए,’ प्रहरी निरीक्षक भुपेन्द्र पालले भने, ‘सीमा स्तम्भबाट नौ मिटरभित्र पर्ने नपर्ने अन्यौल भएपछि हामीले खाल्डो पुर्न लगाएका हौं ।’

कुलो खनिएको खबर पाएलगत्तै प्रहरी निरीक्षक पाल नेतृत्वको सशस्त्र प्रहरी टोलीले सीमा रेखामा दुवै देशले कुनै गतिविधि गर्न नपाउने भन्दै रोकेको हो । अन्तर्राष्ट्रिय कानुनले दशगजाभित्र कुनै पनि गतिविधि गर्न रोक लगाएको छ ।

यसअघि कञ्चनपुरको पुनर्वास नगरपालिका ८ आनन्दबजार क्षेत्रमा पर्ने नेपाल (भारत सीमामा कलभर्ट निर्माणको विषयमा विवाद हुँदा भारतीय सीमा सुरक्षा बलले चलाएको गोली लागि गोविन्द गौतमको मृत्यु भएको थियो ।