पेस्तोल देखाएर लुट्ने प्रहरीसहित ६ पक्राउ

समाज

काठमाडौं । लुटपाटमा संलग्न एक प्रहरी जवानसहित ६ जनालाई प्रहरीले पक्राउ गरी आइतबार सार्वजनिक गरेको छ ।पक्राउ पर्नेमा नुवाकोट खरानीटारमा दरबन्दी भई महानगरीय प्रहरी वृत्त सोह्रखुट्टेमा कार्यरत २६ वर्षीय प्रहरी जवान अजय गुरूङ पनि छन् ।

पक्राउ पर्ने अन्य डान्स बारमा काम गर्ने, टुरिस्ट गाइड, बाउन्सर, सवारी चालक रहेको खुलेको छ । प्रहरीका अनुसार लुटपाटमा संलग्न रहेको आशंका गरिएका अन्य तीनजना फरार छन् ।

शनिबार सोह्रखुट्टेबाट पक्राउ पर्नेहरुको साथबाट ५९ तोला ९८ लाल सुनका गरगहना, नगद एक लाख २५ हजार र ६ थान मोबाइल बरामद भएको छ ।

घटनाको २४ घण्टा बित्न नपाउँदै ती सामान बेच्ने तयारी गरिरहँदा प्रहरीले उनीहरूलाई पक्राउ गरेको हो । उनीहरुले मरुहिटीबाट सुनका गहरगहना र नगद लुटेका महानगरीय अपराध महाशाखाका एसएसपी दिनेश अमात्यले बताए ।

काभ्रे बिर्ता देउरालीका २२ वर्षीय सुभाष खरेल पेसाले टुरिस्ट गाइड थिए भने पक्राउ परेका अर्का धादिङ छत्रेदेउरालीका ३३ वर्षीय राजकुमार तामाङ सवारी चालक हुन् । डान्सबारमा काम गर्ने देव भनिने काभ्रे नमोबुद्धका २१ वर्षीय सुन्दर तामाङ पनि घटनामा संलग्न थिए । बाउन्सर काम गर्ने १९ वर्षीय पाल्देन भनिने क्षितिज तामाङ र २८ वर्षीय लाप्साङ लामा पनि पक्राउ परेको प्रहरीले जनाएको छ ।
प्रहरीका अनुसार प्रहरी वृत्त लैनचौरमा कार्यरत ३२ वर्षीय प्रहरी हवल्दार बलबहादुर मगर र २८ वर्षीय प्रहरी जवान नविन ढकाल फरार छन् । धादिङ छत्रेदेउरालीका ३२ वर्षीय हर्कबहादुर तामाङ पनि फरार छन् ।

शुक्रबार बेलुकी करिब ७ बजेको समयमा काठमाडौं महानगरपालिका–१९ मरुहिटीमा प्रेमरत्न शाक्यको घरको पहिलो तलामा भारतका शिव माइतीले सञ्चालन गरेको सुन कारखानामा उनीहरूले लुटपाट गरेका थिए ।