विपन्न परिवारलाई सिरक वितरण

भीमदत्तनगर ।  कञ्चनपुरको भीमदत्त नगरपालिका–२ मा विपन्न परिवारलाई न्यानो (सिरक) कपडा वितरण गरिएको छ ।

सोमबार भीमदत्त नगरपालिकाका नगरप्रमुख सुरेन्द्र विष्टले यहाँका २६ आर्थिक अवस्था कमजोर भएका व्यक्तिलाई सिरक वितरण गर्नुभएको हो । वडा कार्यालयले विपन्न, दलित, आदिवासी जनजाति, पछाडि पारिएका समुदायको आर्थिक अवस्था सुधारका लागि कार्यक्रम गर्ने नगरप्रमुख विष्टले बताउनुभयो ।

नगरप्रमुख विष्टले भन्नुभयो, “वडा नं २ को कार्यालयले जाडोयाममा कमजोर अवस्थाका स्थानीयवासीलाई सिरक वितरण गरेकामा धन्यवाद दिन्छु”, उहाँले भन्नुभयो, “रचनात्मक कार्यको निरन्तरता आवश्यक छ ।”

चार बैंकलाई भत्ताको जिम्मेवारी

त्यसैगरी भीमदत्त नगरपालिकाले सामाजिक सुरक्षाभत्ता वितरणका लागि यहाँका चार बैंकलाई जिम्मेवारी दिएको छ । स्थानीय तह निर्वाचनपछि वडा कार्यालयबाट सामाजिक सुरक्षाभत्ता वितरण शुरु गरिएको हो । भीमदत्त नगरपालिकाले गत वर्षदेखि वडा कार्यालयबाट भत्ता वितरण शुरु गरेको थियो ।

नगरप्रमुख विष्टले स्थानीय तह निर्वाचनमा सामाजिक सुरक्षाभत्ता वडा कार्यालयबाट वितरण गरिएको बताउनुभयो । “बैंकबाट वितरण हुँदा वृद्धवृद्धाले सास्ती खेप्नुपरेको थियो ।” उहाँले भन्नुभयो, “अहिले घरआँगनकै वडा कार्यालयबाट वितरण हुँदा सहजता थपिएको छ ।”

भीमदत्त नगरपालिकामा कञ्चन बैंकले सबैभन्दा बढी वडामा भत्ता वितरणको जिम्मा लिएको छ । कञ्चनपछि कुमारी बंैकले बढी बडामा भत्ता वितरणको जिम्मा लिएको छ । कञ्चन बैंकले वडा नं २, ३, ६, ७, ८, ९, १०,१५, १६, १७ र १९ वडामा भत्ता वितरणको जिम्मा लिएको छ ।

यसैगरी वडा नं ५, ११, १२, १३, १४ मा कुमारी बैंकले भत्ता वितरणको जिम्मा लिर्दैै आएको छ । वडा नं १ र ४ प्रभु बैंैक तथा वडा नं १८ मा एनससीसी बैंकले भत्ता वितरणको जिम्मेवारी दिएको नगरपालिकाले जनाएको छ ।

चालु आर्थिक वर्षका लागि सामाजिक सुरक्षाभत्तामा रु १८ करोड बजेट विनियोजन गरिएको छ । ज्येष्ठ नागरिक, दलित, दलित बालबालिका, अपाङ्गता भएका व्यक्ति, लोपोन्मुख राउटे, राजी समुदाय, एकल महिलालाई सामाजिक सुरक्षाभत्ता दिने गरिएको छ । भीमदत्तमा १० हजार बढी बासिन्दाले सामाजिक सुरक्षाभत्ता पाउँदै आएका छन् ।

Comments