सत्तापक्ष र प्रतिपक्षबीच आरोप प्रत्यारोप

समाज

काठमाडौँ । सदन बाहिर सत्तापक्ष र प्रतिपक्ष दलका सांसदले एक अर्का प्रति आरोप प्रत्यारोप गरेका छन् ।

सङ्घीय संसद्, प्रतिनिधिसभाको आजको बैठक स्थगन भएलगत्तै सत्तापक्षका सांसदले संसदीय प्रणालीलाई अप्ठ्यारोमा पार्ने गरी प्रतिपक्षले विरोधमाथि विरोध गरी सदन अवरोध गरेको बताएका थिए । भने प्रतिपक्ष दलका सांसदले बहुमतका आडमा सरकार अराजक बन्दै गएको आरोप लगाएका छन् ।

नेकपा संसदीय दलका सचेतक देव गुरुङले संसदीय प्रणालीलाई प्रतिपक्षले अस्वीकार गरी अघि बढेको आरोप लगाए । उनले बहुमतलाई अस्वीकार गर्ने परिपाटी लोकतन्त्रमा कहिलै हुन नसक्ने बताउँदै प्रतिपक्षले अटेर गरी सदन अवरोध गरिरहेको बताए ।

नेपाली काङ्ग्रेसका गगनकुमार थापाले सदनमा असहमति राख्नेलाई समाप्त पार्ने र प्रतिपक्षको अस्तित्वलाई अस्वीकार गर्ने परम्परा सदनमा हावी हुँदै गएको बताए ।

उनले जीवन र मरणको दोसाँधमा रहेका डा गोविन्द केसीको माग सम्बोधन गर्न सरकारले कुनै प्रयत्न नै नगरी अहंकार र दम्भबाट अघि बढिरहेको आरोप लगाए ।

सोही दलका अर्का सांसद बालकृष्ण खाँणले गलत कामको भण्डाफोर गर्ने काम प्रतिपक्षको धर्म भएको बताउँदै बहुमतका आडमा दम्भ देखाएर प्रतिपक्षको अस्तित्वलाई अस्वीकार गर्ने परम्पराले प्रश्रय पाइरहेको छ भने ।