घोडाघोडीमा पर्यटकको सङ्ख्या कम

घोडाघोडी ।

विश्व सिमसार क्षेत्रमा सूचीकृत रहेकोे कैलालीको घोडाघोडी ताल क्षेत्रमा पर्यटकको सङ्ख्यामा कमी आएको छ ।

करीब १३८ हेक्टर क्षेत्रफलमा रहेको घोडाघोडी ताल क्षेत्रको सरसफाइ तथा भौतिक संरचनाको उचित व्यवस्थापन नहुँदा पर्यटकको सङ्ख्यामा कमी आएको हो ।

विसं २०७४ माघ मसान्तसम्म करीब ८१ हजार पर्यटक घोडाघोडी ताल क्षेत्रमा आएपनि गत माघ मसान्तसम्म भने घटेर ७२ हजार ७०० रहेको छ । नेपालको प्रमुख गन्तव्यका रुपमा घोडाघोडी ताल रहे पनि उचित व्यवस्थापन हुन नसक्दा पर्यटकीय क्षेत्रमा पछि पर्दै गइरहेको लम्कीचुहा नगरपालिका–४ कौवापुरका कमल ढकालले बताए । तालमा जमेका लेउ र फोहरको सरसफाइ नहुँदा ताल नै दुर्गन्धित बनेको छ ।

वर्षौंसम्म सरसफाइ नगर्दा तालमा लेउ र झ्याउ कुहिएर पुरिने सम्भावना रहेको घोडाघोडी ताल संरक्षक दीपक शाह बताउँछन् । ताल क्षेत्रमा प्रदूषण बढेको र अवलोकन गर्न आउने पर्यटकको सवारीसाधनका लागि पार्किङको समेत व्यवस्था नहुँदा पर्यटक साधन नरोकी सिधै आवातजावत गर्ने गर्दछन् ।

घोडाघोडी नगरपालिकाका प्रमुख ममताप्रसाद चौधरीले नगर क्षेत्रमा पर्यटक प्रवद्र्धधनको लागि विस्तृत गुरुयोजना निर्माण भइरहेको बताए । घोडाघोडीलाई विश्व जलचर इतिहासमा सङ्कटपूर्ण अवस्थामा पुगेका दर्जनौँ जातका रैथाने माछाका प्रजाति, पुतली तथा अन्य दुर्लभ मानिने चराचुरुङ्गीको उचित वासस्थानका रुपमा लिइने गरिन्छ ।

यस क्षेत्रमा ४५० प्रजातिका वनस्पति र चराचुरुङ्गी देख्न पाइन्छ । बहुमूल्य मानिने औषधिका रुपमा पनि प्रयोगमा आउने सतिसाल, साज, खयरको घना जङ्गल रहेको छ । ताल संरक्षणका लागि विभिन्न सङ्घसंस्थाले वर्षेनि लाखौँ रुपैयाँ खर्चने गरेको भए पनि त्यसको सही उपयोग हुन नसकेको स्थानीयवासीको आरोप छ ।

Comments