प्रेस चौतारीले पत्रकार महासंघ कोशीमा लगायो ताला, सदस्यता शुद्धीकरणका नाममा विभेद गरेको आरोप

कोशी प्रदेश

- न्यूज नेपाल

विराटनगर । प्रेस चौतारी नेपालमा आबद्ध कोशी प्रदेशका पत्रकारहरु आन्दोलित भएका छन् । पत्रकार महासंघ कोशी प्रदेश समितिले सदस्यता शुद्धीकरणका क्रममा विभेदपूर्ण हिसावले मनोमानी गरेको भन्दै प्रेस चौतारीमा आबद्ध पत्रकारहरु आन्दोलित भएका हुन् ।

आन्दोलनका कार्यक्रम अन्तर्गत प्रेस चौतारीका कोशी प्रदेश अध्यक्ष अविजाल बिष्ट नेतृत्वको समूहले आज (आइतवार) पत्रकार महासंघ कोशी प्रदेश समितिको कार्यालयमा तालाबन्दी गरेको छ । माग पूरा नभएसम्म महांसंघको कार्यालयमा लगाएको ताला नखोली चौतारीका अध्यक्ष बिष्टले चेतावनी दिनु भएको छ । उहाँले ‘जबसम्म कोशी प्रदेशमा कार्यरत श्रमजीवी तथा दक्ष पत्रकारहरुले सदस्यता पाउँदैनन् र सदस्यता पाएकाहरुको नविकरण गरिँदैन तबसम्म तालाबन्दी कायम रहने’ विष्टले जनाउनु भयो । समस्या समाधानका लागि चौतारी वार्ताका लागि तयार रहेको बिष्टले जनाउनु भयो । पत्रकार महासंघले विभिन्न जिल्लाको सदस्यता शुद्धीकरणका नाममा मापदण्ड मिचेर नाम सिफारिस गरेको भन्दै कोशी प्रदेशमा प्रेस चौतारी आन्दोलित छ ।

सदस्यता शुद्धीकरणको नाममा केन्द्रले पठाएको मापदण्ड मिचेर नाम सिफारिस गरेको चौतारीको आरोप छ । पत्रकारको सदस्यता शुद्धीकरण तथा नविकरणका लागि पत्रकार महासंघमा पठाइएकाृे नाम छानबिन समिति बनाएर छानबिन गर्नुपर्ने माग प्रेस चौतारीको छ । पूर्वाग्रही ढङ्गले, राजनीतिक आस्था भएकै कारण र गैरपत्रकारको समेत नाम शुद्धीकरणका लागी सिफारिस गरेको आरोप महासंघ र यसमा आाबद्ध पदाधिकारीलाई लगाइएको छ । महासंघको केन्द्रीय समितिले पारित गरेको १५ बुँदे मापदण्ड हु-बहु पालना हुनुपर्ने चौतारीको माग छ ।