विश्वकप छनोट: यमन विरुद्ध खेल्ने नेपाली टोली घोषणा, अनन्त र दिनेश टिममा फर्किए

समाचार

- न्युज नेपाल

काठमाडौं । फिफा विश्वकप २०२६ र एएफसी एसियन कप २०२७ को संयुक्त छनोटको दोस्रो चरण अन्तर्गत यमन विरुद्ध खेल्ने नेपाली टोली घोषणा भएको छ । बेलुका ७ बजे दशरथ रंगशालामा हुने खेलका लागि एन्फाले २३ सदस्यीय नेपाली टोली घोषणा गरेको हो ।

चोटका कारण विश्राममा रहेका नेपाली टोलीका डिफेन्डर अनन्त तामाङ यमनविरुद्धको खेलबाट पुनरागमन गर्ने भएका छन् । यमनविरुद्धको टोली घोषणा गर्दा उनको नाम पनि समेटिएको छ ।

नेपालले आज घरेलु मैदान दशरथ रंगशालामा यमनविरुद्ध खेल्दै छ । सो खेलका लागि कप्तान किरणकुमार लिम्बूको नेतृत्वमा २३ सदस्यीय नेपाली टोली घोषणा गरिएको हो ।

गोलकिपरका लागि किरणकुमार लिम्बू, अभिषेक बरालर दीप कार्की रहेका छन् । डिफेन्डरका लागि अमृत श्रेष्ठ, अन्जन राई, अनन्त तामाङ, छिरिङ लामा, सनिस श्रेष्ठ र रोहित चन्द रहेका छन् ।

त्यस्तै, मिडफिल्डरमा एरिक विष्ट, उत्सव राई, सेसेहाङ आङदेम्बे, दिनेश हेनजान, क्रितिशरत्न छुन्चुले स्थान बनाएका छन् । जिलेस्पीजंग कार्की, आशिष चौधरी, राजेश परियार, सन्जिव विष्ट, अन्जन विष्ट, हिसुब थपलिया, आयुष घलान, मनिष डाँगी फरवार्डको भूमिकामा रहेका छन् ।

फिफा वरीयतामा यमन १५६ औं र नेपाल १७३ औं स्थानमा छ । खेल साँझ ७ बजेबाट सुरु हुनेछ । यसअघि नेपालले दोस्रो चरणको पहिलो खेलमा यूएईविरुद्ध ४–० को हार व्यहोरेको थियो ।