विराटनगरमा पत्रकार देवानमाथि आक्रमण गर्नेलाई कारबाही गर्न पत्रकार संगठनहरुको माग

कोशी प्रदेश

- न्यूज नेपाल

विराटनगर । पत्रकार प्रेम देवानमाथि विराटनगरमा एक समूहले आक्रमण गरेको छ । बिहीबार दिउँसो विराटनगर महानगरपालिकामा बाहिर अज्ञात समूहले उनलाई आक्रमण गरेका हुन् । विराटनगर–७, सातघुम्तीमा बुधबार भएको आगलागी नियन्त्रणमा स्थानीय सरकारको भूमिका कमजोर भएको भन्दै पीडित पक्षले गरेको आन्दोलनमा समाचार सङ्कलनका लागि पत्रकार देवानलाई बोलाइएको थियो । फेसबुक स्टाटसको विषयलाई लिएर आफूलाई आक्रमण गरिएको पत्रकार देवानले बताए ।

‘आन्दोलनको समाचार लेख्न बारम्बार फोन गरेर बोलाए । समाचार सङ्कलन गर्न पुगेपछि अज्ञात समूहले आक्रमण गर्यो,’ उनले भने । आक्रमणबाट पत्रकार देवाको बायाँ हातमा चोट लागेको छ । आक्रमण गर्ने विरुद्ध पत्रकार देवानले जिल्ला प्रहरी कार्यालय मोरङमा उजुरी दिएका छन् ।

उजुरी दिएपछि मोरङ प्रहरीले पत्रकार देवानलाई आक्रमण गर्नेको खोजी कार्य जारी राखेको मोरङ प्रहरीका प्रवक्ता डीएसपी रन्जन कुमार दाहालले जानकारी दिए ।यसैबिच पत्रकार देवानलाई आक्रमण गर्नेलाई कारबाही गर्न पत्रकार सम्बद्ध संघसंगठनहरुले माग राखेका छन् । नेपाल पत्रकार महासंघ, प्रेस यूनियन, प्रेस चौतारी, प्रेस सेन्टर नेपाल, नेपाल आदिवासी जनजाति महासंघ मोरङलगायत विभिन्न संघसंगठनले पत्रकार देवानलाई आक्रमण गर्नेलाई पक्राउ गरी कारबाहीका लागि माग राखेका हुन् ।

‘पत्रकारले कुनै पनि घटनाको विषयमा लेख्ने, रिपोर्टिङका लागि छायाङ्कन गर्ने तथा अन्तर्वार्ता लिने स्वतन्त्रता संविधानले नै दिएको छ । संविधान प्रदत्त काम गर्ने क्रममा कानुन हातमा लिएर कुटपिटमा उत्रिने र लछारपछार गर्ने काम निन्दनीय छ । समाचार लेखेकै कारण पत्रकार देवानमाथि भएको आक्रमणलाई प्रेस तथा अभिव्यक्ति स्वतन्त्रता हननको रूपमा लिएको छ,’ जारी विज्ञप्तिमा उल्लेख छ ।