पहिरोमा पुरिएर गुल्मीमा ४ र बागलुङमा १ जनाको ज्यान गयो

समाचार

काठमाडौं । पहिरोमा पुरिएर गुल्मीमा ४ र बागलुङमा १ जनाको ज्यान गएको छ ।

अविरल वर्षाका कारण जिल्लाको बडिगाड गाउँपालिका–९ नयाँबस्ती बलघासमा पहिरोले पुर्दा १५ वर्षीय विधान परियारको मृत्यु भएको बागलुङका प्रमुख जिल्ला अधिकारी नेत्र प्रसाद सुवेदीले जानकारी दिएका हुन् ।

घर जोगाउनका लागि भल पन्छाउने क्रममा पहिरो खसेर परियारलाई पुरेको सुवेदीको भनाइ छ। परियारको शव निकालेर पोष्टमार्टमका लागि बुर्तिवाङ स्वास्थ्य केन्द्रमा पठाइएको छ । वर्षाका कारण बडिगाडकै वडा नम्बर–१० दर्लिङमा पहिरोका कारण एक घर पुरेको सहायक प्रमुख जिल्ला अधिकारी तथा सूचना अधिकारी चित्राङ्ग बरालले जानकारी दिए।

गुल्मीमा पर्ने मुसिकोट नगरपालिका वडा न–१ बिसौना कटौजेमा पहिरोले २ घर बगाउँदा ४ जनाको मृत्यु भएको मुसिकोट नगरपालिकाका उपमेयर गंगा श्रेष्ठले जानकारी दिएका छन् । मृत्यु हुनेमा वर्ष ४६ का गोरे विक, वर्ष ६७ का हुकुम बहादुर विक, वर्ष ६६ को मसुरी विक र साढे २ वर्षको रियान्सी विकको मृत्यु भएको उपमेयर श्रेष्ठले जानकारी दिए। २ जनाको घाइते अवस्थामा उद्धार गरिएको र थप उद्धार कार्य कार्य जारी रहेको प्रहरी चौकी पौंदि अमराईले जनाएको छ । निरन्तर पानी परिरहेको र भौगोलिक रुपमा कठिनाइ भएकोले उद्धारमा समस्या भएको बताएका छन् ।