नगरपालिकाका अधिकृत दिनेश कट्टेलद्वारा दशनामी समाजको अपमान, शीघ्र कारबाही गर्न माग

कोशी प्रदेश

खाँदबारी । नेपाल दशनामी समाज जिल्ला कार्यसमिति संखुवासभाले खाँदबारी नगरपालिकाका प्रशासकीय अधिकृत एवम् सूचना अधिकारी दिनेश कट्टेललाई कारबाही गर्न माग गरेको छ । प्रशासकीय अधिकृत कट्टेलले सामाजिक सञ्जाल फेसबुकमा लेखेको अपमानजनक शब्दले दशनामी समाज मर्माहत भएको भन्दै जिल्ला कार्यसमितिका अध्यक्ष इन्द्र गिरी र सेरबहादुर वन (सन्यासी) ले आक्रोश व्यक्त गरेका छन् ।

जिल्लाको चाँदवारी नगरपालिका वडा नं. ९ मा बसोबास भई हाल संखुवासभा नगरपालिकाका जिम्मेवार पदाधिकारी कट्टेलले दशनामी समाजका देवराज पुरीले फेसबुकमा लेखेको स्टाटमा केन्द्रित हुँदै दशनामी समाजप्रति तल्लो स्तरको शब्द लेख्दै ‘अपमानजनक टिप्पणी’ गरेका छ्न् । यस्ता अराजक गतिविधिमा संलग्न कट्टेलमाथि कडा कानुनी कारबाही गर्न समाजले खाँदबारी नगरपालिका, जिल्ला प्रशासन कार्यालय संखुवासभा, जिल्ला प्रहरी कार्यालय संखुवासभा समक्ष जोडदार माग गरेको छ ।

प्रशासकीय अधिकृत कट्टेलले सामाजिक सञ्जाल फेसबुकको स्टाटसमा कमेन्ट गर्दै लेखेका छन्, “बकुल्ला बसेको बासघारी र सन्नेसी बसेको गाउँ उग्लिन्छ भन्थे उता उगालि सके यता उगाल्न सकिन्छ कि भन्ने लागो यता आएर हाप्सिलो कराए झै कराउन थालिस अलच्छिना । गिरी पुरी भारति बन यिनका दाजुभाई अझै छन्…..यि मादरचोद बैमान भन्थे बुढापाका । बेहोरा देखाईस हैन ? तेरो के बिगारिदेको छ हँ मैले ? सामाजिक संजालमा मनपरि लेख्छस । तँलाई समय आएपछि चिनजान हुन्छ । नहतारिई पख
भातमारा ।”

दशनामी समाजद्वारा जारी विज्ञप्तिमा लेखिएको छ, “फेसबुक स्टाटसमा उल्लेखित गम्भीर र अपमानजनक शब्दप्रति हाम्रो गम्भीर ध्यानाकर्षण भएको छ । यस्ता आपत्तिजनक पूर्वाग्रही जातीय विद्वेश फैलाउने र सदियौंदेखि मेलमिलापपूर्ण ढंगले रहेको विद्यमान सामाजिक संरचनालाई नै विग्रह गर्ने खालको व्यवहार र प्रवृत्तिप्रति कडा रोष व्यक्त गर्दै खेद प्रकट गरिन्छ ।”

व्यक्तिगत व्यवहार र असहमतिलाई समाधान गर्ने कानुनी र व्यवहारिक विधिहरु पालना गर्नुको सट्टा सामाजिक सन्जाल मार्फत यस खालको व्यवहार नगरपालिकाको जिम्मेवार अधिकृत जस्तो पदमा कार्यरत राष्ट्रसेवकले गर्नु निन्दीय भएको भन्दै समाजले रोष व्यक्त गरेको छ । गैह्रजिम्मेवार, निर्लज्ज, जातीय विभेद फैलाउने, आपसी सद्भाव भड्काउने, अपमानजनक शब्द प्रयोग गर्ने कट्टेललाई कदापी क्षमा दिन नहुने भन्दै विज्ञप्तिमार्फत सम्बन्धित पक्षलाई सचेत गराइएको छ ।

विज्ञप्तिमा थप लेखिएको छ, “नेपाल एक बहुजातीय, बहुभाषिक विभिन्न धर्मावलम्बी भएको देश हो । यहाँ सदियौंदेखि विभिन्न जातजाती, भाषाभाषी आदिका मानिसहरु एक आपसमा आपसी सद्भाव, सहकार्यका साथ मिलेर व्यहार सञ्चालन हुँदै आएका छन् । संखुवासभा जिल्लामा पनि ब्राम्हण, क्षेत्री, तामाङ, राई, गुरुङ, दशनामी, शेर्पा, मगर आदि विविध जातजातीहरु अत्यन्त आपसी सद्भावका साथ हातेमालो गर्दै सामाजिक गतिविधि सञ्चालन हुँदै आएका छन् । एउटा जातिले अर्को जातिप्रति भेदभाव हेपावती अवहेलना गर्नु कदापी सैह्य हँुदैन । आजसम्म यस्तो अभद्र व्यवहार प्रदर्शन भएको पनि पाइँदैन ।”