होलीः होस् गर्नुहोस् हिरासतमा बास होला

काठमाडौं । यस वर्षको होलीलाई मर्यादित बनाउन प्रहरी आक्रामक हुने भएको छ । होलीमा ईच्छाविपरीत रङ छर्कने, दल्ने र लोला हान्नेलाई सार्वजनिक अपराधसम्मको मुद्दा लगाउने तयारीमा प्रशासन र प्रहरी पुगेको छ ।
होलीमा अमर्यादित गतिविधि बढेको भन्दै प्रहरी त्यस्तो निष्कर्शमा पुगेको हो । महानगरीइ प्रहरी परिसर काठमाडौंका प्रहरी उपरीक्षक (एसपी) प्रद्युम्न कार्की भन्छन्, होलीलाई मर्यादित बनाउन प्रहरीले कुनै कसुर बाँकी राख्ने छैन ।
प्रहरीले होली होली सुरक्षा अन्तर्गत १ सय ७ स्थानमा पिकेट, स्ट्राईकिङ्ग, रिजर्भ, मोवाईल, सिआरभि, संयुक्त चेकिङ्ग ट्राफिकसहित, राख्ने भएको छ । होलीमा सांस्कृतिक कार्यक्रम मनाउन १० स्थानमा प्रहरी नायव उपरीक्षकसहितको टोली परिचालन गरिएको एसपी कार्कीले जानकारी दिए ।
होली सुरक्षाअन्तर्गत १ हजार जना सुरक्षाकर्मी परिचालन गरिएको छ । चाडपर्वको नाममा डोरी टागेर एवं अन्य कुनै प्रक्रियाबाट चन्दा उठाउनमा पनि रोक लगाएको छ । होली मनाउने नाममा युवाहरु पसल र व्यापारिक घरानामा पुगेर चन्दा असुल्ने गर्दथे । यस पटक त्यो पनि हुन नदिने प्रहरी जनाउँछ ।
होलीमा महिला एवं पर्यटकहरुसँग अभद्र व्यवहार गर्ने व्यक्तिहरुलाई नियन्त्रणमा लिने र सार्वजनिक अपराधको मुद्दा लगाउने तयारी छ ।
यस्तै होलीमा ट्राफिक प्रहरी पनि सक्रिय हुने भएको छ । जथाभावी तवरले सार्वजनिक सवारी चलाउने, सार्वजनिक सवारी साधनको छत एवं हुटमा बसेर यात्रा गर्न नदिने तर्फ स्थानीय ट्राफिक कमाण्डरसँग समयमै समन्वय गर्दै कारवाही गरिने एसपी कार्कीले बताए । सवारी साधनमा छतमा वा अन्य स्थानमा बसेर बोतलमा नै मादक पदार्थ सेवन गरेमा तत्काल सवारी साधन सहित नियन्त्रणमा लिने तयारी छ ।
हेलमेट नलगाइ, जिकज्याक गर्दै अनियन्त्रित भएर मोटरसाइकल चलाएमा तत्काल नियन्त्रणमा लिन परिसरले निर्देशन दिएको छ । अनि होलीको बहानामा जुवा तथा तास खेल्नेमाथि पनि प्रहरीले निगरानी बढाएको छ ।
अनुहार नै नचिन्नेगरी रङ लगाएर होली खेल्नेलाई पनि प्रहरीले पक्रेर सार्वजनिक अपराधको मुद्दा लगाउने भएको छ ।

Comments