त्रिपालभित्र बसेर परीक्षा दिनुपर्ने बाध्यता

समाज

बेनी (म्याग्दी), ११ चैत । म्याग्दीको बेनी नगरपालिका–४ डाडाँखेतमा अवस्थित बालमन्दिर आधारभूत विद्यालयका विद्यार्थी त्रिपालको टहरामुनि बसेर परीक्षा दिन बाध्य भएका छन् ।

गत फागुन २५ गते साँझ विद्युत् सर्ट भएर विद्यालयको १० कोठे भवन ध्वस्त भएपछि त्रिपालको टहरामुनि बसेर परीक्षा दिन बाध्य भएका हुन् । एकसय ७४ जना विद्यार्थी रहेको विद्यालयका कक्षा १ देखि ३ सम्मका विद्यार्थीले टहरामुनि बाटै परीक्षा दिएभने ४ देखि ७ कक्षाका विद्यार्थीले अहिले धमाधम परीक्षा दिँदैछन् ।

विद्यालयका प्रधानाध्यापक तीर्थ बानियाँले आगलागीबाट सुविधासम्पन्न भवन नष्ट भएपछि टहरामुनिबाटै परीक्षा सञ्चालन गर्न बाध्य भएको बताउनुभयो । आगलागीले भवनसँगै वर्षौंदेखिको कागजपत्र, टेबुल, कुर्ची, कम्प्युटर, पुस्तकालयका पुस्तक नष्ट हुँदा रु ९२ लाख क्षति भएको थियो ।

“वार्षिक परीक्षा आउनुभन्दा केही दिनअघि मात्रै त्यस्तो घटना भयो । केही दिन यही टहरामा पठनपाठन गरायौँ”, प्रअ बानियाँले भन्नुभयोे, “अहिले परीक्षा पनि त्यस्तै ठाउँमा सञ्चालन गरेका छौँ ।” विद्यार्थीले शैक्षिकसत्रको अन्तिममा ६० पूर्णाङ्कको परीक्षा दिनुपर्ने भए पनि यसअघिका तथ्याङ्क पूरै आगलागीले नष्ट गरेपछि १०० पूर्णाङ्ककै परीक्षा लिन लागिएको विद्यालयले जनाएको छ ।

म्याग्दी खोलाभन्दा माथि डाँडामा विद्यालय रहेको हुँदा दिउँसो २ बजेदेखि उच्च वेगमा हावा चल्छ । टहरामुनि परीक्षा सञ्चालन गर्दा हावाहुरीले प्रभाव पार्ने भएकोले दिउँसो १२ बजेभित्रै परीक्षा सम्पन्न गर्ने गरिएको प्रअ बानियाँले जानकारी दिनुभयो ।

“अरु विद्यालयमा विहान ११ बजेदेखि परीक्षा चल्छ । तर हाम्रो ९ बजे नै परीक्षा सञ्चालन गर्नुपर्ने बाध्यता छ”, उहाँले भन्नुभयोे, ‘ दिउँसो २ बजेपछि त टहरामुनि बस्नै सकिँदैन, परीक्षाको कुरा त परै जाओस् ।”

विद्यालयका शिक्षक रामप्रसाद शर्माले समुदायको पहलमा सञ्चालित विद्यालय आगलागीपछि समस्यामा परेको बताउनुभयो । “चैत्र २० गतेदेखि त केही दिन विद्यालय बन्द हुन्छ, तर अर्को शैक्षिकसत्र कसरी सञ्चालन गर्ने भन्ने चिन्ताले सताएको छ”, शिक्षक शर्माले भन्नुभयो । रासस