विद्युत् कटौतीका कारण अस्पतालको उपचारमा समस्या

पर्सा । अनियमित विद्युत् कटौतीका कारण वीरगन्जको नारायणी उपक्षेत्रीय अस्पतालमा उपचार सेवा प्रभावित भएको छ ।

अनियमित विद्युत् कटौतीका कारण अस्पतालमा रहेका उपचार उपकरण सञ्चालनमा समस्या भएपछि उपचारका लागि अस्पताल आएका बिरामी प्रभावित भएका हुन । विद्युत् प्रधिकरणले सार्वजनिक गरेको लोडसेडिंग तालिका बाहेक दिनभरी नै दश÷दश मिनेटमा विद्युत् कटौतीले गर्दा उपकरण सञ्चालन गर्न नसकिएका कारण बिरामीले समस्या खेप्नुपरेको अस्पतालका मेडिकल सुपरिटेन्डेन्ट डा चितरङ्जन साहले जानकारी दिनुभयो ।

उहाँले अनियमित विद्युत् कटौतीका कारण उपकरण समेत बिग्रिने क्रम बढेको बताउनुभयो । विद्युत् कटौतीको सबै भन्दा बढी प्रभाव अस्पतालको प्रयोगशालामा परेकोे छ । विद्युत् कटौतीका कारण प्रयोगशालामा परीक्षण गर्दा समय र लागत दुबै बढेको नारायणी उपक्षेत्रीय अस्पताल प्रयोगशाला विभागका निरीक्षक हरिशङ्कर भगतले बताउनुभयो ।

दैनिक एक हजार दुई सय भन्दा बढी बिरामीको चाप रहेको उपक्षेत्रीय अस्पतालको प्रयोगशालामा २५० जना भन्दा बढी बिरामीको रोगपत्ता लगाउन रगत, पिसाबलगायतको एक हजार ३०० भन्दा बढी परीक्षण हुनेगरेको प्रयोगशालाका टेक्निसियन लालबाबु पाण्डेले जानकारी दिनुभयो ।

उहाँले मासिक रु १४ लाखदेखि रु १५ लाखसम्म आम्दानी गर्ने अस्पतालको प्रयोगशालाको आम्दानी विद्युत् समस्याका कारण घटेर आधा भएको बताउनुभयो ।

बारा, पर्सा, रौतहट, सर्लाही, मकवानपुर र सीमावती भारतीय क्षेत्रका बिरामीको उपचार गराउने मुख्य थलोको रुपमा वीरगन्जको नारायणी उपक्षेत्रीय अस्पताल नै रहेको छ ।

बिरामीबाट लिएको नमुना विद्युत् समस्याका कारण प्रयोगशालामा परीक्षण गर्न नसक्दा एक दिनको काम तीन दिनसम्म लाग्ने गरेको छ ।

अनियमित विद्युत् कटौतीका कारण उपचारमा समस्या देखिएपछि समस्या समाधानका लागि अस्पताल व्यवस्थापन संवेदनशील नभएको अस्पतालकै कर्मचारीको भनाइ छ ।

अस्पतालको जेनेरेटर बिग्रिएका कारण भाडामा ल्याएको जेनेरेटरले समेत खासै फाइदा बिरामीले पाउन नसकेका छैनन् ।

विद्युत् समस्याका कारण अस्पतालमा रहेको इन्डोस्कोपिक, एक्सरे, प्रयोगशाला, अपरेसनथिएटर समेतमा समस्या देखिएको अस्पतालले जनाएको छ । रासस