एक प्रधानाध्यापकद्वारा १४ वर्षकी बालिका बलात्कृत, स्थानीयको दवावपछि प्रक्राउ

समाज

सिरहा, २४ जेठ । सिरहामा एक प्रध्यानाध्यापकले आफ्नै विद्यालयमा अध्यनरत बालिकामाथि बलात्कार गरेको छ । लहान नगरपालिका वडा नम्बर १८ स्थित श्री राजाजी बाबा आधारभुत विद्यालयका प्रध्यानाध्यापक ५५ वर्षीय बैजनाथ चौधरीले एक बालिकालाई बलात्कार गरेको आरोप लागेको छ ।

सोमबार साझ प्रहरीमा पुगेकी पीडितलाई प्रहरीले कार्यालय बाहिर निकालेपछि घटना सार्वजनिक भएको हो । विद्यालयका प्रध्यानाध्यापक चौधरीले आफ्नै विद्यालयको कक्षा ६ मा अध्ययनरत १४ वर्षकी बालिकालाई विद्यालय नजिक रहेको पकडिया गड जंगलमा बोलाएर बलात्कार गरेको पीडितले बताइन् । बालिकाका अनुसार प्रध्यानाध्यापक चौधरीले आइतवार राति १० बजे बोलाएर जंगलमा बलात्कार गरेको हो ।

बलात्कारका क्रममा प्रध्यानाध्यापक चौधरीले बालिकाको शरीरको विभिन्न भाग टोकेको डामहरू देख्न सकिन्छ । बलात्कारपछि बेहोस भएकी बालिका रातभरि जंगलमै रहेको र बिहान होस् आएपछि आफूसँग भएको मोबाइलबाट बिहान साथीलाई फोन गरी आफूलाई सहयोग गर्न आग्रह गरेकी बालिकाकी आमाले बताइन् ।

पीडित बालिकाको आमा बुवा सुस्त मनस्थितिका छन् । छोराछोरीलाई पढाइ दिने र घरमा समेत सहयोग गरिदिने भन्दै घरमा आउने गरेको पीडित बालिकाकी आमाले बताइन् । उसको घर जान थालेपछि नै पीडित बालिकालाई प्रध्यानाध्यापकले यौन शोषण गर्दै आएको आरोप छ । घटनालाई बाहिर लगे ज्यान मारिदिने धम्की प्रधानाध्यापकले दिदै आएको थिए ।

आफू बलात्कृत भएको भन्दै सोमबार साँझ इलाका प्रहरी कार्यालय लहान पुगेकी बालिका र परिवारलाई जाहेरी लेखेर नल्याउन्जेल कार्यालयभित्र नपस्न भन्दै पीडित र पीडित परिवारलाई इलाका प्रहरी कार्यालय लहानका प्रहरी नायब उपरीक्षक हीराबहादुर पाण्डले प्रहरी लगाएर कार्यालय बाहिर निकालेको रहस्य बाहिरिएको छ ।

पीडित बालिका र उनको परिवारलाई प्रहरीले नै कार्यालय बाहिर निकालेपछि राति ८ बजेसम्म बालिका इलाका प्रहरी कार्यालय लहानको गेटमा बस्न बाध्य भइन् । बलात्कार घटनामा खवर पाएपछि प्रहरीले तत्काल पीडितको सुरक्षा र गोप्यनीयतामा ध्यान दिनुपर्ने भएपनि पीडित कार्यालय बाहिर बस्दा घटनाबारे सोध्नेको भिड नै लागेको थियो । तर प्रहरीले पीडितको गोप्यनीताको लागि कुनै चासो नलिनु दुखद् भएको स्थानीयले बताएका छन् ।

लहानका प्रहरी नायब उपरीक्षक हीराबहादुर पाण्डेले जाहेरी लिएर नआउन्जेल आफूले केही नगर्ने बताएका छन् । प्रहरी नायब उपरीक्षक पाण्डेले स्थानीयलाई भने –‘आफूलाई लहानमा बस्न मन छैन । त्यही भएर गर्दिन । मेरो जागिर खाइ दिनुहुन्छ खाइदिनुस् ।’

स्थानीयको दवावपछि बलात्कार गरेको आरोप लागेका प्रधानाध्यापक चौधरीलाई इलाका प्रहरी कार्यालय लहानले सोमबार राति ९ बजे पक्राउ गरेको छ । इलाका प्रहरी कार्यालय लहानका प्रहरी निरीक्षक जुगेश्वर राउतले आरोपित प्रध्यानाध्यापक चौधरीलाई पक्राउ गरी आवश्यक प्रकृया अगाडि बढाएको बताए । प्रध्यानाध्यापक चौधरी प्रहरीको हिरासतमा छन् ।