वायु सेवा निगम डुबाउने खेलमा हवाई माफिया, लिजमा लिने जहाजमा आयात नीति लादियो

निगमसँग रहेको बोइङ ७५७ मर्मतका लागि जानुपर्ने हुँदा आगामी साता देखि जहाज लिजमा लिन खोजेको थियो। निगमले ल्याउन लागेको भुटान एयरको जहाज १५ बर्ष पुगेको छ। यसैमा प्राधिकरणले आयात सम्बन्धि प्रावधान उद्धृत गर्दै रोक लगाएको हो । हवाई उड्डयन नीति २०६३ मा १५ बर्ष पुरानो जहाज आयात गर्न नपाइने प्रावधान उल्लेख रहेको छ।

प्राधिकरणले लिजलाई पनि आयातको रुपमा व्याख्या गरेर भुटान एयर जहाज ल्याउन नपाउने जानकारी निगमलाई दिएको छ। असार ३० गते निगमको बोइङ मर्मतका लागि सिंगापुर जान लागेको हो। त्यसैले ३१ गते देखि भुटान एयरको जहाज लिजमा ल्याउन खोजिएको थियो। दुई वटा एयरबस र एउटा बोइङ मार्फत उडान गरि रहेको निगमले एउटा जहाज अभाव हुने वित्तिकै उडान कटौती गर्नुपर्ने हुन्छ।

सोही कारण भुटान एयरको जहाज लिजमा ल्याउन खोजिएको थियो। जहाज लिजमा लिन निगमले तीन पटक टेन्डर गरेको थियो। अन्तिम टेन्डरमा दुईवटा कम्पनीले आवेदन दिए। त्यसमध्ये भुटान एयर योग्य ठहरिएको थियो।

एउटा जहाज नहुने वित्तिकै दोहा, क्लालालम्पुर, नयाँ दिल्ली, बैंङ्लोर लगायतका गन्तव्यमा उडान स्थगित गर्ने अवस्था आउने निगम स्रोतले जनाएको छ । यी गन्तव्यमा नेपाली कामदार एवं उपचार र अन्य कामले नेपालीले बढी यात्रा गर्छन्। निगमको उडान नहुने वित्तिकै अन्य सेवा प्रदायकले भाडा बढाउन थालि हाल्छन्।

एकातिर भुटान एयरले पनि नेपाल उडानका लागि प्राधिकरणबाट अनुमति पाउन सकेको छैन। अर्कोतिर माफियाहरु पनि कुनै पनि हालतमा उक्त जहाज ल्याउन नदिने मनसायमा रहेका छन् । त्यसको लागी उनीहरुले जस्तोसुकै पनि उपाय अपनाउने रणनीतिमा लागेका छन् । बायु सेवा निगमले त्यसतर्फ ध्यान दिएर समयमै कदम चालेर अगाडी बढेमा उनीहरुको चलखेलबाट बच्न सकिने वायु सेवाविज्ञहरुको भनाई छ ।

Comments