‘कुवाको पानी बाल्टिले तानी’ गीतले बटुल्दै दर्शक–श्रोताको माया

काठमाडौं। नेपाली लोकगीत सङ्गीतको क्षेत्रमा मौलिक शब्द र सिर्जनामार्फत आफ्नो पहिचान स्थापित गर्दै आउनुभएका गीतकार सरोज खड्का ‘निर्दोष’ को पछिल्लो गीत ‘कुवाको पानी बाल्टिले तानी’ ले यतिबेला दर्शक तथा श्रोताको माया बटुलिरहेको छ।

नेपाल लोक स्टारका गायक बिनोद दनुवार र द भ्वाइस अफ नेपालमा सहभागी सिक्किमकी गायिका मोनिका राईको स्वर रहेको यस गीतमा लय तथा सङ्गीत गायक दनुवार स्वयंले भर्नुभएको छ। गीतको सङ्गीत संयोजन सुशील भट्टराईले गर्नुभएको हो भने मिक्सिङ तथा मास्टरिङ राजु कार्कीले गर्नुभएको छ। अनामनगरस्थित अरुण उपत्यका रेकर्डिङ एन्ड प्रोडक्सनमा तयार पारिएको यस गीतलाई गायक बिनोद दनुवारको आधिकारिक युट्युब च्यानलमार्फत सार्वजनिक गरिएको हो।

गाउँघरको ठेट नेपाली शब्द र मौलिक लोकलयमा आधारित यस गीतमा माया–प्रेम, उकाली–ओराली, भञ्ज्याङ–चौतारी, घाँस–दाउरा, गोठालो तथा मेलापातजस्ता ग्रामीण जीवनका विविध पक्षलाई समेट्ने प्रयास गरिएको छ। नेपाली गाउँघरको जनजीवन, प्रेमभाव र मौलिक संस्कृतिलाई गीतमार्फत प्रस्तुत गरिएकाले यसले दर्शक तथा श्रोताको ध्यान आकर्षित गर्न सफल भएको देखिन्छ।

गीतकार सरोज खड्का ‘निर्दोष’, शेरु बराइली, निरज सुवेदी, रमेश विश्वकर्मा र सुब्बा विश्वकर्माको संयुक्त प्रायोजनमा तयार भएको यस गीतले नेपाली लोकसङ्गीतमा मौलिक सिर्जनाको महत्त्वलाई समेत उजागर गरेको छ।

ग्रामीण परिवेश, ठेट नेपाली शब्द र लोकलयको सम्मिश्रण रहेको ‘कुवाको पानी बाल्टिले तानी’ ले नेपाली लोकगीतप्रेमी दर्शक तथा श्रोतामाझ थप लोकप्रियता हासिल गर्ने अपेक्षा गरिएको छ।

गीत हेर्न तथा सुन्न यहाँ क्लिक :

Comments