अरुण तेश्रो डुबाएका अधिवक्ताले ठगे सर्वोच्चका पूर्वन्यायाधीश, सम्पत्ति जोगाउन श्रीमतीलाई सम्बन्ध विच्छेद !

अपराध

- न्युज-नेपाल

काठमाडौँ । अरुण तेश्रो डुबाउन लागि परेका एकजना अधिवक्ता गोपाल शिवाकोटी ‘चिन्तन’ले मुलुकका बरिष्ठ अधिवक्तालाई ठगेका छन् ।

कानुन क्याम्पस स्थापना गर्ने भन्दै आफूलाई मानवअधिकारकर्मी बताउदै आएका ठग अधिवक्ता शिवाकोटीले २ करोड ७६ लाख ठगी गरेको अभियोगमा उनका साथी बद्रीकुमार थापालाई समेत महानगरीय प्रहरी परिसर काठमाडौंले पक्राउ गरी ठगी मुद्दामा कारबाही अघि बढाएको छ ।

२०५० सालमा अरुण तेश्रोको राष्ट्रिय योजना तुहाउन लागिपरेका शिवाकोटीले अरुण तेश्रोबाट नै मनग्य आम्दानी गरेको स्रोतको दावी छ । उनले ठगी गर्दै आर्जन गरेको सम्पत्ति भने श्रीमतीको नाममा जम्मा गर्ने गरेको समेत पाइएको छ ।

सर्वाेच्च अदालतका पूर्वन्यायाधीश पवनकुमार ओझाको अध्यक्षतामा कलेज स्थापनाका लागि खोलिएको मञ्जुश्री एकेडेमी कम्पनीको रकम सिवाकोटी र थापाले व्यक्तिगत प्रयोजनमा खर्च गरेका हुन् । कम्पनीका सेयरधनी रहेका सर्वाेच्चकै पूर्वन्यायाधीश भरतबहादुर कार्की, वरिष्ठ अधिवक्ताहरू कृष्णप्रसाद भण्डारी, हरिहर दाहाल, विश्वकान्त मैनाली, श्रीहरि अर्याललगायत पीडित बनेका छन् ।

कलेज सञ्चालनका लागि भनेर जम्मा गरेको रकम उनीहरूले हिनामिना गरेको महानगरीय प्रहरी परिसर काठमाडौंका प्रमुख एसएसपी वसन्तकुमार लामाले बताए । ‘दुवैजनालाई ठगी मुद्दामा जिल्ला अदालतले सात दिनको म्याद दिएको छ,’ उनले भने ।

तर, अधिवक्ता सिवाकोटीले भने आफूले लिएकोमध्ये धेरै रकम साथी बद्रीकुमार थापालाई दिएको बताएका छन् । थापाविरुद्ध यसअघि नै कम्पनीले उच्च अदालत पाटनमा चेक अनादार मुद्दा दायर गरिसकेको छ । उनले कम्पनीलाई एक करोड ६ लाखको चेक दिएकोमा बाउन्स भएपछि मुद्दा दायर भएको थियो । पटक–पटक छलफलमा बोलाउँदा पनि पैसा फिर्ता नदिएपछि ठगी मुद्दामा जाहेरी दिइएको कोइरालाले बताए ।

श्रीमतीको नाममा सम्पत्ति जोडे, गुम्ने डरले कानुनी रूपमै श्रीमतीसँग सम्बन्धविच्छेद गरे

सिवाकोटी र थापाले ठगी गरेको रकमबाट श्रीमतीको नाममा सम्पत्ति जोडेको अनुसन्धानमा खुलेको छ । थापाले काठमाडौंको टोखा र चितवनमा जग्गा किनेका छन् । सिवाकोटीले पनि श्रीमतीको नाममा सम्पत्ति जोडेका छन् । कम्पनीले उनीहरूका श्रीमतीलाई समेत विपक्षी बनाई मुद्दा दायर गरेको छ । तर, सम्पत्ति गुम्ने भएकाले दुवैले श्रीमतीसँग कानुनी रूपमा भने सम्बन्धविच्छेद गरेका छन् ।