टुकुचा तरकारी बजारले नेकपामा विवाद, पूर्वएमालेका मजदुर नेताको व्यक्तिगत स्वार्थमा समस्या देखिएको प्रदेश ३ अध्यक्ष दाहालको आरोप

काठमाडाैं । भृकुटि मण्डपको प्रदर्शनीमार्गस्थित टुकुचा तरकारी बजारको विषयले नेकपामा आन्तरिक विवाद चुलिदै गएको छ ।

टुकुचा खोला किनारमा रहेको तरकारी बजार हरित कृषि सहकारी संस्थाले समाज कल्याण परिषद्सँगको सम्झाैता बमोजिम चलाउदै आएको थियो । ७ रोपनी क्षेत्रफलमा फैलिएको ईच्छुमति सामुदायिक कृषि बजारको विषय पूर्वमाओवादी र पूर्वएमालेबीच विवाद सिर्जना गराउने अस्त्र बन्न पुगेको छ ।

समाजकल्याण परिषद्ले कृषि बजारसँग भएको सम्झाैता एकतर्फी ढंगले खारेज गरेपछि प्रदेश ३का नेकपा अध्यक्ष नारायण दाहालले महिला तथा बालबालिका मन्त्री थममाया थापाालाई पत्र लेखेर विरोध जनाएका छन् ।

अध्यक्ष दाहालले लेखेको पत्रमा मन्त्री थापालाई उक्त निर्णय फिर्ता लिन आग्रह समेत गरेका छन् । सम्झाैता खारेज भएको कुराले प्रदेश ३ को पार्टीको ध्यानाकर्षण भएको भन्दै उनले भनेका छन्, ‘देशले ३ खम्बे अर्थनीति अवलम्बन गरेको अवस्थामा सहकारीको माध्यमबाट तरकारीको विक्री वितरण र व्यवस्थापन गर्ने कामलाई निरन्तरता दिन उचित हुने हुँदा हालको कारवाही स्थगित गरी इच्छुमती सामुदायिक कृषि बजारको व्यवस्थापन र नियमन हरित कृषि सहकारीमार्फत नै कार्य अगाडि बढाउन अनुरोध गर्दै यो सिफारिस गरिन्छ ।’

यद्यपी व्यवसायीबीच विवाद भएको भने अध्यक्ष दाहालले समेत स्विकार गरेका छन् । स्वार्थ समूहको कारण त्यहाँको सम्झाैता खारेज गरिएको भन्दे पूर्वमाओवादी नेताहरुको बुझाई रहेको छ भने, पूर्वएमालेका नेताहरुले भने निर्णय सहि भएको भन्दै अडान राख्दै आएको पार्टी आन्तरिक स्रोतको दाबी छ ।

अध्यक्ष दाहाले लेखेको पत्रमा भनिएको छ, उक्त स्थानमा व्यवसायीका वीचमा भएको अन्तरविरोधको कारण समस्या उत्पन्न भएको छ । यसकारण ३ नम्बर प्रदेश संगठन कमिटी, जिफन्ट र व्यवसायीवीचमा अत्यन्तै लामो छलफल, मध्यस्थता र सहमति गर्ने प्रयास भइरहेको छ ।’

न्युज-नेपालले अध्यक्ष दाहाललाई सम्पर्क गर्दा उनले भने, प्रदेश ३ पार्टी र काठमाडाैं जिल्ला पार्टीले निर्णय गरेर यसैलाई निरन्तरता दिने भन्ने सहमति भएको छ । बरु यसमा कुनै किसिमका अनियमितता भएका छन् भने त्यसलाई हल गर्नु पर्छ भन्ने कुरा समेत पार्टीमा भएको हो । तर, पूर्वएमालेका मजदुर नेता विनोद श्रेष्ठको व्यक्तिगत स्वार्थका कारण विवाद देखिन पुगेको छ । समाजकल्याण परिषद्सँग २५ वर्षका लागि सम्झाैता भएको छ । यसलाई विथोल्ने प्रयास भएपनि यस्तो हुनै सक्तैन ।

Comments