बुद्ध एयरको काउन्टर तोडफडको आरोपमा राजपाका सांसद साहविरुद्ध पक्राउ पुर्जी जारी

अपराध

- न्युज-नेपाल

काठमाडाैं । बुद्ध एयरको जनकपुर कार्यालयको काउन्टर तोडफोड गरेको आरोपमा प्रतिनीधिसभाका सांसद प्रमोद साहविरुद्ध पक्राउ पुर्जी जारी भएको छ ।

जिल्ला प्रहरी कार्यालय धनुषाले सांसद साहलाई पक्राउ गर्न काठमाडाैं प्रहरीलाई मंगलबार पत्राचार गरेको छ । धनुषाका प्रहरी प्रमुख एसपी शेखर खनालका अनुसार सांसद साहलाई पक्राउ गर्न पत्र काठमाडौं पठाउने प्रक्रिया थालिएको छ ।

आजै नागरिक उड्डयन प्राधिकरण जनकपुर कार्यालय प्रमुख सन्तोष ढकालले सांसद साहमाथि तोडफोड तथा हवाइ उडानमा बाधा अवरोध सिर्जना गरेको भन्दै गैरसैनिक हवाई उडान ऐन २०१५ अन्तर्गत जिल्ला प्रहरी कार्यालय धनुषामा मुद्दा दर्ता गरेको थियो ।

बुद्ध एयरको जहाज निर्धारित समयभन्दा ३ घण्टा ढिला भएको झोकमा सांसद साहले सोमबार जनकपुर विमानस्थलस्थित बुद्ध एयरको काउन्टरमा तोडफोड गरेका थिए । सांसद साहले जहाजको अवस्थाबारे बुझ्न खोज्दा एयरलायन्सका कर्मचारीहरुले राम्रो रेस्पोन्स नगरेको भन्दै काउन्टरमा लात्तीले हिर्काएको स्वीकार गरेका छन् ।